Желідегі екінші жол іске қосылғаннан кейін телімнің өткізу қабілеті 5 есе артады дейді мамандар. Қазір тәулігіне 12 жұп жүк пойызын өткізіп отырған болса, екінші желі пайдалануға берілгенде олардың саны тәулігіне 60 жұп жүк пойызына дейін көбейеді. Бұған дейін айтылғандай, жоба өте тиімді мультипликативті әсерге ие. 20 жыл ішінде ол Ұлттық қорға 543 млрд теңгені үстеме пайызымен қайтарады. Сондай-ақ бюджетке 4 трлн теңгеден астам салық түсімдерін қамтамасыз етеді. Құрылысты жүргізу барысында қазақстандық қамту үлесі 85 пайызды құрап отыр.
Құрылыс жұмыстарын ұйымдастыру үшін Балқаш стансасы, Жақсыбұлақ, Үшарал қаласы бойынша үш басқару орталығы іске қосылған. Бұлармен бірге Жарық, Сарықұм, Ортадересін, Шолқызыл, Жақсыбұлақ, Ақтоғай, Үштөбе, Сайқан стансаларында 8 өндірістік база құрылып, жұмыс істеп тұр. Тағы бір құптарлығы қазақстандық зауыттармен инертті материалдар, темірбетон шпалдар және басқа да бұйымдарды жеткізіп алу бойынша келісімшарттар жасалыпты.
Осы күнде Мойынты-Балқаш телімінде жұмыстар жүргізіліп жатыр. Көкдамбақ-Сарықұм аралығына жер төсемі төселген. 80 шақырым болатын бекіткіштері бар шпалдар жеткізіліп, 62 шақырымдық рельсті шпал торлары төсеуге дайын.
Құрылыс алаңында 125 бірлік арнайы техника және 200-ге жуық қызметкер жұмыс істейді. Жер төсемін салу және рельс-шпал торын төсеу үшін қосымша 6 төсеу пойызын және 8 хоппер-мөлшерлегішін тарту жоспарланған.
