Аймақтар • 06 Наурыз, 2023

Балыққа да бап керек

150 рет
көрсетілді
2 мин
оқу үшін

Күміс көлдерді омырауына жақұт моншақтай жарқырата тағып, көркімен көрген жанның таңдайын қақтыратын Көкшетау мен Қорғалжынның арасындағы су айдындарының басым көп­шілігі – далалық көлдер есебінде. Тайыз бол­ғандықтан қақаған қыста балыққа да қауіп көп.

Балыққа да бап керек

Биыл қыс қатты болды. Са­қыл­даған сары аяз су тү­бін­дегі табиғат байлығына да қа­терін төндіріп жатыр. Кейбір көлдердегі мұздың қалыңдығы – бір метрге жуықтады. Солтүстікке көктем келіп, көл біткен мұз құрсауынан құтылғанша әлі де табандатқан ай жарымға жуық уақыт бар. Мамандардың айтуына қарағанда, мұздың ас-т­ың­ғы қабатында оттегінің толайым сарқылып, көп балықтың қы­на­дай қырылатыны да – осы мезгіл. Қазір өңірде бұл тарап­тағы қыруар жұмыс қызу қолға алынған. Айталық, Зеренді ауда­нының көлдерінде мұз ою жұмыстары ұйымшылдықпен жүр­гізіліп жатыр. Далалық көлдер санатындағы Құркөлдің де мұ­зы қалың. Бір айта кетерлігі, балық та көп көрінеді. Балықты сақтап қалу үшін күн сайын мұз ойылады.

– Біз мұндай жұмыстарды қыс бойы жүргізіп келеміз. Басты мақсат табиғаттың иен байлығын сақтап қалу ғой. Дәл осындай игілікті іс «Есіл» бассейнінің аума­­ғында да ұйымдастырылып жатыр, – дейді облыстық балық инспекциясының бас маманы Ерлан Қосмағанбетов.

Облыста балық шаруа­шы­лығын дамытуға әбден жарамды 600-ге жуық су айдыны бар. Осы жылы осынау көл­дердің 132-сінде аэрация жүр­гізілді. Мамандар 7 мыңнан аса ойық ойыпты. Оған қоса ба­лық «патшалығын» оттегімен қам­тамасыз ету үшін 400-ден аса тұсын кесіп, ауа өткізетін орын әзірлеген.

– Мұз астына оттегін жі­берумен қатар, көл беті қоқыс пен қамыстан да тазартылады. Тамаша табиғатымызды аялап, қамқорлық көрсетіп отыратын болсақ, жүдемес еді. Келер ұрпаққа қалдыратын мұрамыз да осы емес пе? – дейді балық инспекциясының бас маманы Ақан Сыздық.

Көлдерді тазартуға жүзге жуы­­қ адам күші тартылыпты, арнайы техника да бөлінген. Дәл осылай жанашырлықпен күш біріктірілсе, балықтың да бағы таймайтын шығар.

 

Ақмола облысы