Осыған байланысты су тас қыны қаупі төнуі мүмкін 51 елді мекен тіркелген. Қазір 15 елді мекенде қауіп сейілген. Ал 36 елді мекенде қауіп сақталып отыр. Оның ішінде 26 елді мекен Жайық өзенінің бойында орналасқан. Бұл елді мекендерде тіркелген 17 мың 30 тұрғын үйде 86 мыңнан астам тұрғын бар.
Департамент бастығының міндетін уақытша атқарушы, азаматтық қорғау полковнигі Нұрлан Жаңабаевтың айтуынша, жергілікті меншіктегі Ералы су торабы Қызылқоға ауданында орналасқан. Бұл су торабының жағдайы қанағаттанарлық деңгейде делініп отыр. Арнайы бекітілген жол картасына 2021 жылы Жайық өзенінің Махамбет ауданындағы Махамбет ауылының тұсында ұзындығы 4,5 шақырым, Алға ауылының маңында 3,2 шақырым жағалауды нығайту жұмыстары енгізілген.
Атырау қаласы мен оған таяу орналасқан Жұмыскер, Геолог, Ақсай, Атырау, Еркінқала, Дамбы, Балықшы, Қайыршақты, Кеңөзек елді мекендеріндегі қорғаныс бөгетіне күрделі жөндеу жұмыстары жүргізіледі. Жайық өзені мен Каспий теңізінің жағалауындағы 86 шақырымнан астам қорғаныс бөгеті бар.
Су басу қаупі бар ауданның бірі – Индер. Аудан әкімі Дарын Шамұратовтың айтуынша, қазір су басу қаупінің алдын алу жұмыстары жүргізіліп жатыр.
– Биыл қар мол жауды. Күн күрт жылынып, жауын жауса, ауданның бірқатар ауылында еріген қардың салдарынан қиындық туындауы ықтимал. Сол себептен, аудан аумағында қар суының үйге кірмеуін қамтамасыз ету үшін 18 техника жұмылдырылды. Қазір Индербор кентінде, Жарсуат, Өрлік, Елтай ауылдық округтеріндегі тұрғын үйлерді су басу қаупі болуы мүмкін аумақтар нақтыланды. Күшейтілген режімде ұйымдастырылған жұмыстардың нәтижесінде Жарсуат ауылдық округінде қауіп сейілді, – деп хабарлады Д.Шамұратов.
Әкімнің мәліметінше, Индер ауданында елді мекендерден 11 мың текше метр қар шығарылған. Көшелерден 22 мотопомпамен еріген қар суы сорылып жатыр. Бұл жұмысқа төтенше жағдайлар қызметінің су соратын екі көлігі тартылған.
Қызылқоға ауданының әкімі Қанат Әзмұхановтың дерегіне қарағанда, 7 наурызға қараған түні нөсер жаңбыр жауған. Жаңбыр мен еріген қардың салдарынан Миялы ауылдық округінде су деңгейі көтерілген. Бұл ауылішілік су басу қаупін туындатқан.
– Осыған байланысты Қызылқоға ауданының әкімдігі тарапынан жедел жұмыстар ұйымдастырылды. Бірінші кезекте су басқан үйлерді құтқару жұмыстары жүргізілді. Миялы ауылында 4 вакуум, 6 мотопомпа, 5 «КамАЗ» автокөлігі, 2 тиегіш техника және басқа да арнайы құралдар тартылды, дейді Қ.Әзмұханов.
Оның айтуынша, толассыз жауған жаңбыр Сағыз ауылының ішімен өтетін Ноғайты өзенінің арнасын толтырып жіберген. Сол себептен, өзен жағалауын бекіту үшін 80-нен астам тұрғын жұмылдырылған. Қазір Ноғайты өзеніндегі су деңгейі біртіндеп төмендеп келеді. Ал Сағыз өзенінде ағыс бәсеңдеген.
Жаңбыр мен еріген қар суы «Миялы-Сағыз» бағытындағы жолдың 35-шақырымындағы тұсын басқан. Бұл – Соркөл ауылының тұсы. Дәл осы жерде 7 наурызда жеңіл көлік жолдан шығып, еріген қар суына батып кетті. Бұл деректі Атырау облысы әкімі мен облыстық полиция департаментінің баспасөз қызметтері де растады.
«Жергілікті уақытпен сағат 06:30 шамасында Қызылқоға ауданындағы Жангелдин ауылынан шыққан такси жүргізушісі көлігімен Соркөл ауылының тұсында жолдан шығып, жиектегі суға түсіп кеткен. Оған жүргізушінің жылдамдықты асырып, басқару жүйесін игере алмағаны себеп болған. Көліктегі жолаушылар зардап шеккен жоқ. Жолаушылар Соркөл, Сағыз ауылдарына жеткізілді» деп мәлім етті облыс әкімінің баспасөз қызметінен.
Бірақ аталған жолда көлік қозғалысына шектеу қойылмады. Өйткені еріген қардың суынан жолға төніп тұрған қауіп жоқ. Ал полиция департаменті көлік жүргізушілеріне сақтық шараларына аса мұқият болуды ескертіп отыр.
Атырау облысы
