Қарағанды облысы әкімінің бірінші орынбасары тағайындалды

АСТАНА. 26 маусым. Президент әкімшілігінің келісімімен және Қарағанды өңірінің басшысы Нұрмұхамбет Әбдібековтің өкімімен Асылбек Жексенбайұлы Дүйсебаев облыс әкімінің бірінші орынбасары болып бекітілді. Бұл туралы «ҚазАқпарат» хабарлады. А.Ж.Дүйсебаев 1979 жылы туған. Жоғары білімді, экономист-менеджер мамандығы бойынша С.Сейфуллин атындағы Ақмола аграрлық университетін бітірген. Еңбек жолын 1996 жылы«Агро-центр Астана» жауапкершілігі шектеулі серіктестігінде бақылаушы-ревизор ретінде бастаған. Ол 2002 жылдан мемлекеттік қызмет саласында еңбек етіп келеді. Көлік және коммуникация министрлігі бөлімінің бас маманы, бөлім бастығы болған. 2004-2006 жыл аралығында Президент әкімшілігі мемлекеттік бақылау және ұйымдастыру жұмыстары бөлімінің бас инспекторы болып қызмет атқарды. 2006 жылдан бастап Қарағанды облысында қызметін жалғастырды. Қазыбек би ауданы әкімінің орынбасары, Қарағанды қаласы әкімінің орынбасары болды. 2007 жылдан 2010 жылдың қаңтарына дейін облыс әкімі аппаратын басқарды, одан кейін облыс әкімінің орынбасары болып тағайындалды. 2010-2012 жылдар аралығында Президент әкімшілігінің мемлекеттік инспекторы, Көлік және коммуникация вице-министрі болды. Ол осы тағайындауға дейін Табиғи монополияларды реттеу агенттігі төрағасының орынбасары лауазымында қызмет етті. Жолдыбай Базар. Дереккөз: «ҚазАқпарат». Фото: «ҚазАқпарат».