![Қарғыннан әзір қауіп жоқ](/media/2023/03/14/taskyn-1.jpg)
Облыс аумағының 75 пайызын қар басып жатыр. Тек Нұра өзенінде кейінгі жылдардағы нормамен салыстырғанда жинақталған су қоры 28 пайызға артық. Өзгесінде нормадан 3-10 пайызға төмен. Оларда сең жүргенде арнасынан асып кетпеуі үшін сірескен көк мұзды бұрғылау жүріп жатыр. Бұдан бөлек, су өтетін құбырлар, арықтар аршылуда.
– Ғарыштан бақылау қазіргі уақытта облыс аумағының 75 пайызы қар астында жатқанын көрсетті. Нұра өзені бассейнінде су қоры кейінгі жылдардағы орташа есептен 28 пайызға жоғары, ал қалған өзендерде 3-10 пайызға нормадан төмен. Облыстағы ірі су қоймаларынан су жіберілуде. Атап айтқанда, Самарқанд және Ынтымақ су қоймаларынан секундына 5-8 текше метр су жіберіледі. Елді мекендерден 2,1 млн. текше метр қар шығарылды. Су басу қаупі бар аймақтарда алдын алу жұмыстары жалғасуда, дейді Төтенше жағдайлар департаментінің басшысы Мұрат Қатпанов.
Бұқар жырау ауданы мен Теміртау қаласының маңындағы Нұра өзенінде мұз кептелістерінің алдын алу үшін мұзды кесу және бұрғылау жұмыстары қауырт жүргізілуде. Мұз жамылғысының әлсіреуі де мұздың жылжуы кезінде өзеннің толып кетуіне жол бермейді. Су тасқыны қаупі бар өңірлерде алдын алу шаралары жалғасуда. 110 шақырым су бұру траншеялары тартылды. 158 шақырым каналдар мен арықтар тазартылды. 3 286 бірлік су өткізгіш құбырлар мен 281 көпір тазартылды.
Жалпы, жария етілген деректерге сүйенсек, өңірде 150-ге жуық елді мекен мен 100-ге жуық көлік жолына қызыл судан қауіп бар. Жердің тоңы орташа есеппен 160 см-ге жуықтайды. Облыс бойынша төтенше жағдайдың алдын алу үшін бюджеттен 3 миллиард теңге бөлінген. Тасқынға тосқын қою үшін 3,5 мыңға жуық адам және 1 200 техника сақадай-сай.
Облыс әкімі Ермағанбет Бөлекпаев тарапынан алдын алу шаралары бойынша құзырлы органдарға нақты тапсырмалар берілді.
–Тасқын сулардың апатсыз өтуі үшін су бұру, арықтар жүйелерінің дайындығын барлық жерде қамтамасыз ету қажет. Сондай-ақ жеке аумақтарды қар мен қоқыстан тазарту жөнінде халықпен түсіндіру жұмыстарын жандандырыңыз, деді өңір басшысы. Сонымен қатар барлық гидроқұрылыстың дайындығы мен жұмысы тұрақты бақылауда. Аптаның соңына дейін автожолдардағы су өткізу құрылыстарын тазалауды аяқтау қажет.
Негізі, департамент тарапынан басқару ұйымдары үшін тасқынға қатысты жұмыс алгоритмі жасалған. Елді мекендерде төтенше жағдай туындағанда басшылыққа алатын нұсқаулықтар әзір.
Қарағанды облысы