Астанада өткен Central Asia First championship – 2023 роботтехника ойындарында еліміздің түкпір-түкпірінен келген 1 200-ге жуық оқушы бақ сынасты. Қарағанды облысының намысын сегіз команда қорғап, оның алтауы жүлделі орындар мен аталымдарға лайық деп танылды. Мәселен, ой жарысында екінші орын иеленген «Мұрагер» мамандандырылған мектеп-лицей интернаты оқушыларының JelToqSun командасы АҚШ-та өтетін First championship – 2023 дүниежүзілік чемпионатына жолдама алды.
– Балалар барын салып дайындалды. Бұған дейін олар жас роботтехниктердің бірнеше жарысында жүлделі орын алған еді. Команда құрамында жеті оқушы бар. Енді дүниежүзілік чемпионатқа дайындаламыз. Осы жарыста мектептің тағы бір командасы – Alash инженерлік шеберліктің жоғары деңгейі және жобалаудың инновациялық тәсілдері үшін Engineering Excellence Award аталымында марапатталды, – деді «Мұрагер» мамандандырылған мектеп-лицей-интернатының информатика және роботтехника мұғалімі Бердібек Қазығұлов.
Сонымен қатар Best pit award finalist аталымында Mirinda командасы жеңіске жетті. Motivate Award аталымында жүлде Бұқар жырау ауданы Үштөбе тірек мектебінің Ushtobe team командасына бұйырды. Core value аward finalists аталымында «Дарын» мамандандырылған мектеп-лицей-интернатының Daryn командасы озық шықты.
– Бұл байқауда біз өңірлік кезеңде Innovation project аталымында бірінші орынды иелендік. Core values секциясында жүлдегер атандық. Роботтармен жұмыс істеуге ұзақ уақыт жұмсалды. Осы секцияда үздік ондықтың қатарынан табылғанымызға қуаныштымыз, – дейді «Дарын» мамандандырылған мектеп-лицей-интернатының 8-сынып оқушысы Абылай Қадырбек.
Н.Нұрмақов атындағы мамандандырылған мектеп-лицей-интернатының #Nurmakov командасы да қамшы салдырмай, жазда өтетін шетелдік байқаулардың біріне жолдама алды.
– Біздің жоба жеке сектор мен ауылдық аудандарда электр энергиясының үзілу мәселесін шешуге бағытталған. Мұны арнайы құрылғыларды үш фазаға орналастыру арқылы басқара аламыз. Ол үшін макет жасадық, құрылғымыздың қалай жұмыс істейтінін көрсеттік. Балалар жобаны сәтті қорғап шықты. Дегенмен, әлі де жетілдіру керек. Жазда Бразилияға немесе АҚШ-қа бақ сынауға барамыз, – дейді роботтехника бойынша жаттықтырушы, информатика пәнінің мұғалімі Айдар Сейілханов.
ҚАРАҒАНДЫ
