2022 жылы қарашада Мемлекет басшысының Францияға ресми сапары аясында «Қазақстан темір жолы» ҰК» АҚ мен «Alstom Transport SA» АҚ арасында бірқатар келісімге қол қойылған болатын. Келісім бойынша, «Alstom» компаниясы 2023-2029 жылдар аралығында қазақстандық зауытта электровоз шығарады және «Қазақстан темір жолы» ҰК» АҚ үшін 245 электровоз жеткізіп береді.
Төрт қалада ашылғалы отырған өндірістік жобаларды жүзеге асыруға «Alstom» 50 миллион еуро шамасында инвестиция салуды көздеп отыр. Осынау игі шара еліміздегі электровоз тапшылығы мәселесін шешеді және Қазақстан жүк жөнелтушілеріне сапалы қызмет көрсетуге мүмкіндік ашады.
Сыртқы істер министрінің орынбасары Роман Василенконың айтуынша, былтыр Қазақстан мен Еуропалық одақ елдері арасындағы өзара тауар айналымы 27,6 пайызға өсіп, 40 млрд АҚШ долларына жеткен.
«Қазақстан ЕО және оған мүше мемлекеттермен кеңейтілген әріптестік пен ынтымақтастық туралы келісімге қол қойған және оны ратификациялаған аймақтағы жалғыз ел болып қала береді. Бұл ретте Қазақстан өткен жылы сирек кездесетін металдар, «жасыл» сутегі, аккумулятор, көлік-логистикалық әлеуетті дамыту, сондай-ақ тауарларды жеткізу тізбегін әртараптандыру сияқты жаңа салаларда ынтымақтастық орнатты», деді министрдің орынбасары.
