Білім ордасы «Ауылдық аймақтардағы тірек мектептерінің әлеуетін арттыру» жобасына енгізілген. Соған сәйкес 27 оқу сыныбы мен қосымша кабинеттер қайта жасақталған. «Қазақстан халқына» қорынан бөлінген 249 млн 825 мың теңге демеушілік қаржыға қажетті құрал-жабдықтар сатып алынған.
– Ауылдар мен қалаларда орналасқан мектептер арасында алшақтық байқалады. Білім беру сапасы әсіресе, елді мекендердегі мектептерде төмен деген көзқарас бар. Бұл – баршаны ойлантатын жайт. Мұндай мәселені жүйелі әрі кешенді шешу үшін «Қазақстан халқына» қоры серіктестермен бірге ауылдық тірек мектептерді дамыту жөнінде шешім қабылдады. Осыған байланысты «Ауылдық жерлердегі тірек мектептердің әлеуетін дамыту» бағдарламасы аясында 17 ауылдық тірек мектепті жабдықтап, әдістемелік қолдау көрсетуді қолға алдық. Осы кезге дейін өңірлерде 11 мектеп қайта жарақтандырылды. Осылайша, білім сапасын көтеру үшін жаңа жабдықтар мен дағдылар шағын жинақты мектептерге бағытталады. Өйткені мұндай шағын мектептерде материалдық-техникалық базаның ескілігі мен кадр жетіспеушілігі секілді өзекті мәселе бар, – дейді қоғамдық қордың басқарма төрағасының орынбасары Ләззат Шыңғысбаева.
Мектеп директоры Сабыржан Жұпарғалиевтың айтуынша, басқарушы құрамның біліктілігі шыңдалған. Өзі және әдістеме, инновациялық жұмыс жөніндегі орынбасарлары педагогикалық шеберлік орталығы ұйымдастырған «Мектепті тиімді басқару: мектеп командасы мен білім сапасы» курсында білім жетілдірген. Ал ұстаздар үшін «Бағалауды қалыптастыру» тақырыбында дәріс өткізілген. Математика, информатика, ағылшын тілі, биология, қазақ тілі және физика пәндерінің мұғалімдері аталған орталықта біліктілігін арттырған.
– Мектебіміз толықтай жаңарды. Интерактивті тақталармен, басқа да қажетті жабдықтармен қамтылды. Бұрын қолымыз жетпей жүрген STEM кабинеті ашылып, оқушыларға жаңа мүмкіндіктер ашылды. Еңбек пәні үшін арнайы жабдықтар алынды. Қыздарымыз тігін машинкасымен іс тігуді үйреніп жүр. Оқушылар түрлі робот құрастырады. Енді бұл мектепте алаңсыз жұмыс істеуге, балалардың сапалы білім алуына барлық жағдай жасалды. Келешекте білім сапасы артады, – дейді С.Жұпарғалиев.
Атырау облысы
