Облыстық аумақтық сайлау комиссиясының төрағасы Азамат Айманакумовтың мәліметінше, 412 165 сайлаушы тіркелген 296 сайлау учаскесі дауыс берді. Өңірдегі 9 ауруханада, әскери бөлім мен уақытша ұстау изоляторында 11 жабық сайлау учаскесі ашылған. Дауыс беру үдерісін Еуропадағы қауіпсіздік пен ынтымақтастық жөніндегі ұйымның 14 халықаралық байқаушысы бақылады.
Таңмен таласас тұрып, сайлау учаскесіне асыққан Дүйсәлі Қалдыбай Жылыой ауданының орталығы – Құлсары қаласында тұрады. Қос жанары көрмегенімен, өмірге құштарлығын жоймаған. Үнемі белсенді болып жүреді. Түрлі сайыстарға қатысып, көркемсөз оқудың шебері атанған зағип жан бұл сайлауда да белсенділігін танытты. Сөйтіп, ол Құлсары қаласындағы №97 сайлау учаскесіне алғашқы болып дауыс берді. Оны сайлау учаскесіне ұлы алып келген.
Ал Атырау қаласының тұрғыны Маржан Сұлтанова – бірінші топ мүгедегі. Бірақ ол да сайлау бюллетенін үйіне алдырмай, №38 сайлау учаскесіне өзі келді. «Әр сайлауға міндетті түрде қатысып жүрмін. Мұны өзімнің азаматтық борышым деп есептеймін. Бұл сайлаудан күтетін үмітім мол. Сол себептен, жаңа бастамалары бар адал кандидаттарды қолдау үшін дауыс бердім», дейді ол.
Құрманғазы ауданындағы Теңіз ауылдық округінде орналасқан №177 сайлау учаскесі сайлау комиссиясының төрағасы Дәулет Қауменовтің мәліметінше, мұнда 1 114 сайлаушы тіркелген. Оның ішінде мүмкіндігі шектелген 2 сайлаушы бар. Ал 16 адам үйден дауыс беруге өтініш түсірген.
Дауысты өз үйінде бергендердің қатарында ардагер Екатерина Абсатырова да бар.
«Менің балалық шағым соғыс жылдарымен тұспа-тұс келді. Отбасымызбен концлагерь тұтқыны болдық. Тұтқындағы үш жылда көрген қорлығым әлі де түсіме енеді. Қиындықты жеңуге тырыстық. Бүгінгі бейбіт өмірдің шырқы бұзылмаса екен деп тілеймін. Соғыс өрті тұтанбасын, жас ұрпақ жоғары білім алып, бақуатты өмір сүрсе екен», дейді Е.Абсатырова.
Атырау облысы
