Таңғы сағат онға дейін сайлаушылардың 15,1 пайызы дауыс беріп үлгерді. Белсенділік біршама жоғары. Облыс орталығы мен шалғайдағы шағын ауылдарда белсенділік танытуда. Айталық, Біржан сал ауданындағы 31 сайлау учаскесінде 9 465 сайлаушы тіркелген болса, сағат онға дейін 3 124 адам өз таңдауын жасап үлгерді.
– Сайлаушылардың белсенділігі біршама жоғары. Демалыс күн болғандықтан асықпай келіп жатқандар да бар. Саяси партиялар мен қоғамдық бірлестіктердің байқаушылары сайлау барысын қадағалап отыр, – дейді аудандық ішкі саясат бөлімінің жетекшісі Миргүл Аяғанова.
Ел азаматтарының өз сайлау учаскелеріне барып, дауыс берулеріне барлық жағдай туғызылған. Нақтырақ айтсақ, қалалық және аудандық автобус бағыттары өңірдің барлық елді мекендерін қамтиды. Тіпті, Астана қаласының маңындағы елді мекендерде жол жүру тегін.
Қияндағы Қорғалжын ауданында да аймақ тұрғындары саяси белсенділік танытты. Бұл ауданда ұйымдастырылған 17 сайлау учаскесіне 5 216 сайлаушы тіркелген. Қорғалжын аудандық мәслихатына 28 үміткер бар. Сайлау барысын «Amanat» партиясы мен «Дауыс» қоғамдық байқаушылары коалициясы бақылады. Бұл ауданда сағат 11-ге дейін сайлаушылардың 1 176-сы немесе 22,5 пайызы дауыс беріп үлгерді.
– Үміткерлердің сенімді өкілдері де қатысып жатыр. Жауапты науқан ұйымшылдықпен өткізіліп жатыр, – дейді аудандық ішкі саясат және тілдерді дамыту бөлімінің басшысы Гүлнәр Сыздықова.
Облыс орталығында да саяси науқан барысында жалпақ жұрттың ел ертеңіне зор сеніммен қарайтынын аңғаруға болады.
Ақмола облысы
