Саяси науқанның қорытындысына орай өткен жиынға белсенді журналистер Ерқанат Көпжасарұлы, Ақбөпе Тәңірберген, Нұрсұлтан Құрман қатысты. Олар қоғамда пікірін ашық білдіріп жүрген әр саланың белсенді жастарына үгіт-насихат кезінде ақпараттық қолдау көрсеткенін жеткізіп, блог жұмысының статистикасын жария етті.
– Кеше біз де көппен бірге істелген жұмыстың нәтижесі бола ма деп алаңдап, тағатсыздана сайлау қорытындысын күттік. Біз ешқандай ұйым немесе саяси қозғалыс емеспіз. «Жастар үні» өтініш білдірген жас кандидаттардың ұсынылған партияларына қарамай-ақ, барлығына жаппай қолдау көрсетті. Алайда біз өзіміз үшін партиялық тізімдерде жас кандидаттардың ұсынылуы бойынша статистика жасадық. Мысалы, Жалпыхалықтық социал-демократиялық партия тізіміндегі 19 адамның ішінде 1 жас кандидат болса, «Ақ жолдан» түскен 54 үміткердің 6-уы жас. Ал «Байтақтағы» 18 кандидаттың ішінен 1-і жас үміткер. Сондай-ақ «Respublica»-дан 25 адамның 5-еуі, «Amanat»-тың 90-нан 17-сі, «Халық партиясының» 52-ден 3-еуі, «Ауыл» партиясының 25-тен 9-ы өтті. Бағдарлағанымыздай, көрсеткіштер жаман емес. Енді біз бұл жас үміткерлерді Exit-рull-дың соңғы нәтижелеріне сәйкес, тізімге енгізілуі бойынша бақылаймыз, – деді журналист Ақбөпе Тәңірберген.
Жиында «Жастар үні» блогының бастамашыл өкілдері бір ай бойы подкасттар, блогтар, посттар жариялап, жас кандидаттарды жан-жақты қолдау білдіргенін жеткізді. Бұған қоса олар блог жұмысы әрі қарай да жалғасатынын айтты.
– Блог 20 ақпанда Алматы қаласында құрылды. Барлық партияның тізімінде кімдер барын алдын ала қарадық, зерделедік. Партия қатарындағы жастардың үлесі қаншалықты? Жастарға бөлінген 30 пайыз квота шарты қаншалықты орындалып жатқанына назар аудардық. Біз Мәжіліс пен мәслихаттарда орындарды квотаны жабу үшін қолданбай, жас кандидаттарға қолдау көрсету идеясын алға тарттық. Бүгінде 100-ден астам жас үміткерге қолдау көрсетілді. Ең бастысы, біз оларды партиялар немесе салалар бойынша бөлмей, барлық жүгінген кандидаттарға көмектестік. Басты шартымыз – 35 жасқа дейінгі жастар болуы керек еді. Әрине, біздің аудиториямыз бар болғандықтан, негізінен әлеуметтік желілерде ақпараттық қолдау көрсетілді. Жұмысымыздың маңызды көрсеткіштерінің бірі – жас кандидат, қоғамдық пікір көшбасшысы Дәулет Мұқаевтың жеңісі, – деп атап өтті журналист Ерқанат Көпжасарұлы.
«Жастар үні» жас кандидаттарды қолдау блогының өкілдерінің есеп беру баспасөз брифингіне Парламент Мәжілісі депутаттығына кандидат Дәулет Мұқаев та қатысты.
– Мына хаттамалардың барлығын қарап отырсақ, 167 округтің басым бөлігінің барлығында жеңіске жеткенбіз. Сондықтан 10-15 минут бұрын әлеуметтік желіге салып, сүйіншімді сұрап тастадым. Бірақ ресми мәліметті де күтеміз, – деді Дәулет Мұқаев.
Жалпы бұл жолғы сайлау билік жүйесіне өзіндік өзгерістерін енгізді. Өйткені Exit-poll нәтижесі бойынша саяси додаға түскен жеті партияның алтауы Парламентке баруы мүмкін. Оның ішінде жылдар бойы осыны мақсат тұтқан «Ауыл» мен аз ғана уақытта құрамын жасақтап, тартысқа түскен «Respublica» партиялары бар. Сондай-ақ бұл екі электораттың – ауыл тұрғындары мен жастардың позицияларының нығая түскенін көрсетеді.
– Жас депутаттарға үлкен жауапкершілік жүктеліп отыр. Өйткені өз білімімен, күшімен алға суырылып шыққан, өзіндік концепциясы бар жастарды жас сайлаушылар, қоғамдық пікір көшбасшылары қолдайды. Олар шынымен де Парламентке жаңашылдық әкелетініне және заң шығарушы органдарды «оята алатынына» сенімдіміз, – деді журналист Нұрсұлтан Құрман.
Айтпақшы, Еуразия интеграциялық институтының сараптамасына сәйкес, Парламент Мәжілісінен «Amanat» партиясы 38-40 орын, «Ауыл» партиясы 8 орын, «Respublica» партиясы 6 орын, «Ақжол» партиясы 6 орын, «Халық партиясы» 5 орын, ЖСДП 4 орын алуға тиіс.
