Шешуші кезең

Бразилияда өтіп жатқан әлем чемпионатының 1/8 финалы басталды Бүгін топтық кезеңнен өт­кендер 1/8 финалда кездеседі. Бұл кезеңге ең бірінші болып «В» тобындағы Голландия мен Чили құрамалары шыққан болатын. Екінші болып «А» тобының өкілдері Бразилия мен Мексика жолдама алды. Енді ережеге сәйкес, осы топтарда бірінші және екінші орын алған Бразилия мен Чили, Голландия мен Мексика командалары кездеседі. Содан кейін Колумбия – Уругвай құрамаларының жасыл алаңдағы айқасы өтеді. Кейбір сарапшылар 1/8 финалдағы ойын­дардың ішінде ең қызықты және тартысты кездесу осы коман­далар­дың арасында өтеді деуде. Бұл матчта жеңген команда ши­рек финалда Бразилия –Чили құра­маларының арасында өтетін кездесудің жеңімпазымен күш сынасады. Осылардан басқа 1/8 финалда Франция – Нигерия матчы өтеді. Франция өз тобынан бірінші орын алып келесі айналымға шықса, африкалықтар екінші орынмен жолдама алды. Бұл командалардың арасындағы ойын да қызықты болатыны сөзсіз. Рас, алғашқы кезде Дидье Дешам құрамасының ойынына қарап, Франция алысқа бармайды дегендер де болған. Алайда, Франция топтық кезеңнің соңғы матчтарында жақсы ойнап, қазір енді чемпиондық болмаса да жүлдеге таласа алатын команда екенін көрсетіп отыр. Ал «G» тобынан 1/8 финалға Германия мен АҚШ шықты. Бұл топтағы соңғы матчтар  Германия мен АҚШ және Португалия мен Гана арасында өтті. Онда 1/8 финалға шығу үшін Ганаға жеңіс керек болса, АҚШ пен Германияға тең ойнаса да болатын еді.  Бірақ, африкалықтар мақсатына жете алмады. Олар Португалиядан 2:1 есебімен ұтылып қалды. Ал Германия қарсыластарын 1:0 есебімен ұтып, 7 ұпаймен бірінші орын алып, келесі айналымға шықты. 1/8-ге жеңілсе де 4 ұпаймен АҚШ та жолдама алды. Енді Германия келесі ойынын Алжирге қарсы өткізеді. Осы жерде Алжирдің өз тарихында тұңғыш рет 1/8 финалға шыққанын айту керек. Олар әлем чемпионатына небәрі үш рет қана қатысқан. Бірінші рет 1982 жылы, содан кейін 1986 жылы ойнаған. Ал соңғы рет 2010 жылы бағын сынап көрген. Осы үшеуінде де Алжир топтық турнирден шыға алмаған. Енді, міне, Алжир алғаш рет плей-оффқа жолдама алып отыр. Бұл жолдама да оларға оңай келмеді. Олар соңғы кездесуде Ресеймен ойнап, 1:1 есебімен тең түсті. Егер Алжир жеңілгенде 1/8-ге Ресей шығатын еді. Осы топтағы Бельгия мен Корея арасында өткен ойында «қызыл перілер» 1:0 есебімен жеңіске жетті. Сөйтіп, Кореяның жолын бөгеп, оларға ешқандай мүмкіндік қалдырмады. Бельгияның келесі қарсыласы – АҚШ құрамасы. Ал Аргентина 1/8 финалда Швейцариямен кездеседі. Осы ойында жеңген команда Бельгия – АҚШ матчы­ның жеңімпазымен ойнайды.  Сол сияқты Германия – Алжир кездесуінің жеңімпазы ширек финалда Франция – Нигерия матчында жеңген құрамамен бақ сынасады. Ал биылғы әлем чемпионатының сенсациясы деп саналатын Коста-Рика командасы 1/8 финалда Грекиямен ширек финалдық жолдаманы сарапқа салады. Егер осы ойында коста-рикалықтар ұтса, олар тұңғыш рет ¼ финалға шығатын болады. Бірақ, Грекия командасын да есептен шығара алмаймыз. Қазір гректер сүрініп, жығылып жүрсе де келесі айналымға шығудың жолын табатын жолы болғыш команда ретінде көрініп жүр. Бұл ойынның жеңімпазы Голландия – Мексика матчында ұтқан командамен кездеседі. 1/8 финалдың ойындары 28 маусым мен 2 шілде күндері өтсе, ширек финал 4-7 шілде күндері өтеді. Осылайша чемпионаттың келесі кезеңіне Еуропаның – 6, Оңтүстік Американың – 5, Орталық және Солтүстік Американың – 3, Африканың 2 командасы шықты. Ал Азиядан бірде-бір команда жоқ. Дастан КЕНЖАЛИН, «Егемен Қазақстан».