Спорт • 26 Наурыз, 2023

Әскери қызметші қошқарды 2050 рет көтеріп, рекорд жаңартты

299 рет
көрсетілді
1 мин
оқу үшін

Алматы қаласында Наурыз мейрамы аясында Ұлттық спорт түрлерінен өткен жарыста Қорғаныс министрлігі Орталық спорт клубының әскери қызметшісі ефрейтор Бауыржан Әбдіқайым рекорд жаңартты, деп хабарлайды Egemen.kz Қорғаныс министрлігінің баспасөз қызметіне сілтеме жасап.

Әскери қызметші қошқарды 2050 рет көтеріп, рекорд жаңартты

Екі сағат ішінде ол 50 келі болатын қошқарды 2050 рет көтеріп, жаңа рекорд орнатты. Осыдан бір жыл бұрын Бауыржан қошқарды 1600 рет көтерген болатын. Жалпы бұл оның осындай жарыстағы сегізінші жеңісі.

- Мен өз рекордымды ерік-жігері мықты қазақ халқына арнадым. Әрине күш-қуат тұрғысынан оңай болған жоқ. Бірақ шыдамдылық пен күнделікті жаттығулар өз нәтижесін көрсетті. Маған қолдау көрсеткендерге рахмет. Алға Қазақстан, - деді спортшы.

Ефрейтор Бауыржан Әбдіқайым Орталық спорт клубында 2017 жылдың мамыр айынан бастап коменданттық взводтың аға сарбазы лауазымында қызмет атқарып келеді. Спортшы Алматыда ұйымдастырылатын республикалық, қалалық марафондар мен ірі спорттық іс-шараларға тұрақты түрде қатысып тұрады.

Биыл Отан қорғаушылар күніне орай ефрейтор Бауыржан Әбдіқайым Алматыдан Таразға дейін жүгіруді жоспарлап отыр.