Әлем • 26 Наурыз, 2023

Батумиде Наурыз мерекесі тойланды

306 рет
көрсетілді
2 мин
оқу үшін

Аджария Автономиялық Республикасының астанасында Грузияда тұратын қазақстандықтарды ғана емес, сонымен қатар Аджарияның көпұлтты халқын біріктірген көктем мерекесі Наурыз атап өтілді. Сонымен қатар қазақ мәдениеті осы күндері Батумиде жүрген түрлі елдердің туристеріне паш етілді, деп хабарлайды Egemen.kz СІМ баспасөз қызметіне сілтеме жасап.

Батумиде Наурыз мерекесі тойланды

Қазақстанның Грузиядағы елшісі Мәлік Мырзалин өзінің құттықтау сөзінде Наурыздың бейбітшілік пен мейірімділікті бейнелейтінін, қуаныш пен сүйіспеншілікке толы, терең философиялық мәні мен жалпыәлемдік мәдени маңызы бар, бірлік пен келісім мерекесі, сондай-ақ достық пен өзара сыйластықты нығайтуға ықпал ететін шын мәнінде жалпыхалықтық мейрам екенін атап өтті. 

Аджария Жоғарғы кеңесінің вице-спикері Тите Арошидзе де құттықтау сөз сөйлеп, халықтар арасында тығыз достық қарым-қатынас орнатуда халықаралық Наурыз мерекесінің маңыздылығы мен өзектілігін атап өтті. Аджария астанасында Наурыз мерекесін өткізгені үшін Қазақстан елшілігіне алғысын білдіріп, аталған іс-шара Қазақстан мен Грузия арасындағы мәдени-гуманитарлық ынтымақтастыққа тағы бір жаңа үлес болатынына сенім білдірді. 

Іс-шара аясында қазақ мәдени мұрасының әсемдігі мен байлығын көрсететін бата беру мен шашу қазақтың салт-дәстүрлері көрсетілді. Қонақтар асық ату, арқан тарту және басқа да ұлттық спорт түрлері бойынша жарыстарға қатысты. 

Мәдени бағдарлама барысында Маңғыстау облысынан арнайы келген «Ақ Шағыл» этно-фольклорлық тобы мен «Жорға» би ансамблі өз өнерлерін көрсетті. Қазақ шығармаларының көне ұлттық музыкалық аспаптарда виртуоздық орындалуы және дәстүрлерімізді көрсететін халық билері көрермендердің қошеметіне бөленді. 

Мереке қонақтары, Батуми тұрғындары мен туристері арнайы тігілген қазақ киіз үйінде орналасқан А. Кекілбаев атындағы Маңғыстау облыстық тарихи-өлкетану мұражайының зергерлік бұйымдарымен, ұлттық киімдерімен қуана танысты.

Дәстүрлі қазақ тағамдарының бай мәзірі және көктемнің басты тағамы – Наурыз көжемен мерекелік дастархан жайылды. Наурызды мерекелеудің шарықтау шегі тұсаукесер дәстүрлі рәсімін өткізу болды.