«Астана таңдауы-2014» байқауының жеңімпаздары анықталды

АСТАНА. 30 маусым. Астана әкімі жыл сайын дәстүрлі түрде өткізіліп келе жатқан «Астана таңдауы-2014» жалпықалалық байқауының жеңімпаздарын арнайы марапаттады.   Бұл туралы astana.kz хабарлады. Биыл қатарынан үшінші жыл ұйымдастырылып отырған дәстүрлі «Астана таңдауы» байқауына байланысты қабылданған анкеталар мен өтінімдер astana.gov.kz сайтына орналастырылды. Онда сайтқа кірген әрбір адам бір рет дауыс беруге мүмкіндік алды. Байқауға 195 аталым бойынша 250 өтінім келіп түскен. Бұлардың арасында «Үздік мұғалім» – «Астана Дарыны» ғылыми-тәжірибелік орталығының директоры Майра Құрманбаева, «Үздік дәрігер» – №1 қалалық аурухананың жоғары дәрежелі дәрігер-урологы Кирилл Чичеров, «Үздік жол жөндеуші» – «Прогресс KZ» жауапкершілігі шектеулі серіктестігінің инженері Бекзат Мүсеев, «Үздік учаскелік инспектор» – Астана қаласы ішкі істер департаменті Алматы аудандық учаскелік инспекторы Бауыржан Таумаханов, «Үздік энергетик» – «Астана қаласы Энергетика басқармасы» мемлекеттік мекемесі энергиямен қамту бөлімінің басшысы Олжас Ищанов, «Үздік құрылысшы – «Бай-Тан компаниясы» жауапкершілігі шектеулі серіктестігінің директоры Еркін Омаров, «Үздік жүргізуші» – «№1 Автобус паркі» акционерлік қоғамының жүргізушісі Серік Адаев байқау жеңімпазы атанды. Астана әкімі Иманғали Тасмағамбетов: «Біз байқау жеңімпаздарын мемлекеттік наградаларға ұсындық. Мемлекеттік байқау комиссиясы дұрыс шешім қабылдап, награда өз иесін табады деп ойлаймын», – деді. Еске сала кетейік, «Астана таңдауы» алғаш рет елорда әкімі Иманғали Тасмағамбетовтің бас­тамасымен 2012 жылы өткі­зілген болатын. Жолдыбай Базар. Дереккөз: astana.kz. Фото: astana.kz.