Білім ордасын биыл бітіргелі отырған озық ойлы шәкірттердің арасында Абылай Амангелдіұлы мен Полина Вардашко да бар. Еркін елдің ертеңіне сенетін өрендер сабақты үздік оқиды. Түрлі білім байқауынан жүлделі орындарды иеленген. Екеуі де білімге құштарлықтың алғашқы жемісін көре бастады. Жақында Абылай Германияның Бремен қаласындағы Jacobs Bremen University-нің Computer Science факультетінде тегін білім алу грантын иеленді.
– Еуропадағы жетекші жоғары оқу орнында білім алу – үлкен мүмкіндік. Бала кезімнен Германияда оқуды армандап едім. Мақсатым – IT-саланың білгір маманы атану, – дейді Абылай.
Ал Полина Канаданың Торонто университетінде биотехнология мамандығы бойынша тегін оқуға шақырту алып отыр. Оған бұған дейін Германиядағы Jacobs Unieversity, АҚШ-тың Drexel University, Канададағы Carleton University және University of Ottawa секілді жоғары оқу орындарынан шақырту мен білім гранттары келген.
– Бірнеше жылдан бері Торонто университетіне оқуға түсуді ойластырған едім. Болашақта биотехнологияны жетілдіріп, фармацевтика индустриясын дамытуды көздеп жүрмін. Жоғары білім алған соң түрлі вакцина ойлап тапқым келеді, – дейді Полина.
Атырау облысы
