«Елді жайлаған індет және оның салдары кәсіпкерлерге оңай тимегені анық. Былтырдан бері саяси жүйені жаңғыртуға баса мән бердік. Енді экономикадағы нақты мәселелермен айналысатын кез келді. Бұл жұмысты мықтап қолға алу керек», деді Мемлекет басшысы VIII сайланған Қазақстан Республикасы Парламентінің бірінші сессиясында.
Президенттің айтуынша, алдағы міндет – жеке меншікті қорғау және нарықтың бәсекелі болуын қамтамасыз ету. Ол үшін сот және құқық қорғау жүйесіндегі реформаларды жалғастыру қажет.
«Мен еліміздің кәсіпкерлеріне үндеу жасағым келеді. Қазақстан – бәріміздің ортақ мекеніміз. Ендеше, қастерлі Отанымызды бірге өркендетейік, болашағымызды бірге құрайық. Мен Президент ретінде Сіздерге мемлекет тарапынан қолдау көрсетілетініне кепілдік беремін. Біз шағын және орта бизнестің бәсекеге қабілетін арттыру мәселесіне баса мән береміз. Осы орайда, шағын және орта бизнеске қолдау көрсетудің бірыңғай кешенді бағдарламасын әзірлеу қажет», деп түйіндеді Қасым-Жомарт Тоқаев.
