«Бүгінде тергеу амалдары жүріп жатыр. Тағы еске салам, ұлым кәмелет жасына толған азамат. Мен Черновтар отбасынан кешірім сұрадым, қажет жағдайда емдеуге көмек көрсетуге дайын екенімді де айттым. Бірақ, олардан хабар болмады. Алдағы 10 күн немесе 2 апта көлемінде тергеу нәтижесімен таныс боласыздар. Бұл процеске мен араласып жатқан жоқпын. Черновтар татуласқысы келеді деген ақпарат бар. Қазір маңыздысы тергеу органдарының бағасы берілсін, одан әрі көре жатармы», деді Дәулет Тұрлыханов БАҚ өкілдеріне.
Еске сала кетсек, жаңа сайланған депутаттың ұлы Нұрасыл Болат бірнеше адамды соққыға жыққан. Бұл факт ҚР ҚК 293-бабы (Бұзақылық) бойынша сотқа дейінгі тергеп-тексерудің бірыңғай тізілімінде тіркелген.
Одан бөлек, тілшілер Дәулет Тұрлыхановтан депутат ретінде Мәжіліс қабырғасында қандай мәселені қолға алатынын сұрады.
«Мен халық игілігіне жұмыс істеуге келдім. Бір ай бойы тұрғындармен, еңбек ұжымдарымен кездестім. Штабтағы өкілдерім тұрғындардың өтініш, арызын жинады. Соның негізінде мәселелер тізбегін жасадық. Оның дені мектептің жетіспеуі, аурухана және көпбалалы аналарға қатысты болады», дейді депутат.
