Аталған қойылымның философиялық негізі, идеялық мазмұны мен режиссерлік жұмысы «ALEM» заманауи хореография балетінің көркемдік жетекшісі Бақыт Тажиновтің бастамасымен іске асып отыр. Эксперименттік хореография стиліндегі би нөмірлері заманауи композиторлардың музыкасымен сүйемелденген. Балет әртістері пластика, икемділік, тонус және музыканы ерекше сезінуді талап ететін – «іштей сезіну арқылы» билей алатын бірегей техниканы меңгергенін кезекті рет көрсетті. Қойылым филармонияның басқа шығармашылық ұжымдарының аспапшы-музыканттары мен шақырылған балет әртістерінің қатысуымен ерекше. Соның бірі – Петропавл қаласынан келген ерекше қажеттіліктері бар адамдарға арналған «Sensitive» би театрының солисі Даниял Кангожин. Осындай бірлескен қойылым Е.Рахмадиев атындағы МАФ балет әртістері үшін алғашқы инклюзивті тәжірибе болғанын да айта кетейік.
Қойылымның қоюшы-балетмейстерлері – Ұлан Изенаев пен Жанна Сейітова, балет репетиторы – Жанат Сәрсембаев. Шақырылған қоюшы-балетмейстерлер – «Sensitive» би театрының бас балетмейстері Ольга Ростовщикова (Петропавл), Ұлттық ұланы Ән және би ансамблінің көркемдік жетекшісі және қоюшы-хореографы Гүлмира Рашева (Астана).
Астанада өткен премьерадан кейін пластикалық дивертисмент қойылымы гастрольдік сапарға шықпақ. Мәселен, 30 наурызда Үкілі Ыбырай атындағы Ақмола облыстық филармониясының концерт залының сахнасында «Solo» қойылымын көкшетаулық көрермендер халқы тамашалайды. Ал 31 наурызда өнерпаздар Петропавлда Ақан сері атындағы Солтүстік Қазақстан облыстық филармониясында өнер көрсетеді.
«Alem» заманауи хореграфия балетінің құрамында күрделі хореографиялық тапсырмаларды орындай алатын кәсіби бишілер жұмыс істейді. Олардың шеберлігі актерлік дарындылықпен, орындау мәнерлілігімен толыққан. Әртістер өз концерттерінде хореографиялық өнердің байлығы мен сұлулығын көрсете отырып, классикадан модернге дейінгі сан алуан би стильдерін меңгерген.
