Елбасының бастамасымен өмірге келген «Саламатты Қазақстан» бағдарламасы денсаулық сақтау саласының ұзақ мерзімге арналған тиімді шараларын белгілеген тұғырнама болып табылады. «Саламатты Қазақстан» бағдарламасында ел тұрғындарының денсаулығын нығайтуға ынтымақтастық жауапкершілігі жүктелген.
Елорданың денсаулық сақтау саласында өзінің салмақты орнын алатын №2 қалалық аурухананың ұжымы осы бастамалардың баянды болуына барынша басымдық беріп келеді. Соңғы үш жыл көлемінде біз аурухана аясындағы емдеу шараларын оңтайландыру мақсатында ауқымды жұмыс жасадық. Астана қаласының тұрғындары күннен-күнге артып келе жатқандығы баршаға мәлім. Осыған байланысты қалалық денсаулық сақтау саласы мекемелеріне жүктелетін жауапкершілік жүгі де аса зор. Бір ғана мысал, 2013 жылы №2 қалалық ауруханада 14 525 адам стационарлық ем қабылдаса, 2014 жылдың өткен үш-төрт айында аурухананың қабылдау бөлімі арқылы 15 мың адам тіркеліп емдеу шараларын қабылдаған.
Біз Денсаулық сақтау министрлігі тарапынан қолға алынған реформалардың тиімділігін арттыруға күш саламыз. Бұл ретте, клиникалық шығынды азайту тобы, сырқаттарға қаншалықты медициналық қызмет көрсетсе, соншалықты қаржыландыру жүйелерін қолданамыз. Медициналық қызметті арттыру жолында қаржыландыру жүйесі емдеу шараларының тиімділігіне тікелей қатысты жолмен іс-жүзіне асырылады. Ауруханада менеджменттің жаңа жүйелері – ішкі мүмкіндіктерді тиімді басқару, қаржы үнемдеу, басқару жүйелерін жетілдіру арқылы тиімділікке қол жеткізу тәсілдері қолданысқа енгізілуде.
Үстіміздегі жылдың басынан біздің ауруханада еңбекақы төлеу жүйесін әртараптандыру тәсілі өндіріске енгізілді. Яғни, кім қанша ота жасайды, клиникалық бөлімдерде сырқаттарға медициналық қызмет көрсету сапасы қаншалықты жоғары, емдеу шараларының тиімділігі қандай деңгейде, сырқаттар тарапынан түскен арыз-шағымдар мен алғыс-хаттардың ара салмағы қандай? Міне, осы көрсеткіштер арқылы әрбір клиникалық бөлімнің жұмысына баға беріледі.
Қазір №2 қалалық ауруханада 15 клиникалық бөлімше жұмыс істейді. Қалалық денсаулық сақтау саласының сұранысына байланысты соңғы кезеңде ауруханамызда жақ және бет әлпеті хирургиясы, травмотология бөлімшелері ашылды. Біздің аурухана кешенінде негізінен медицинаның ең күрделі де жауапты саласы – медициналық хирургияға басымдық берілген. Медицинаның ең күрделі бұл саласында аурухана үлкен жетістіктерге жетіп отыр. Мәселен, тек өткен жылдың өзінде ғана біздің ауруханамызда 11464 күрделі ота жасалды. Ауруханаға қабылданатындардың 80 пайызы шұғыл медициналық көмекке зәру болған сырқаттар болып табылады.
Бүгінгідей жаһандық бәсекелестік белең алған кезеңде денсаулық сақтау мекемелері де уақыт талабынан сырт қалмауы керек. Осыған байланысты біз ауруханада заманауи инновациялар мен жаңа технологияларды қолдануға бірінші кезекте күш саламыз. Бірқатар шетелдік клиникалармен тығыз ынтымақтастық қарым-қатынас орнатып, өзара тәжірибе алмасамыз. Германияның танымал да, білікті кардиохирургтарының №2 қалалық ауруханада шеберлік-сыныптарын өткізу дәстүрге айналған. Нақ осындай инновациялық ізденістердің нәтижесінде біз өзіміздің ауруханадағы кардиохирургиялық бөлімде жұмыс істеп тұрған жүрекке ота жасау, яғни жүректі жасанды аппаратқа қоспай-ақ ота жасау тәсілін енгіздік. Бұл аурудың асқынуына тосқауыл қойып, сырқат адамның реанимация бөлімінде жататын мерзімін қысқартуға жол береді. Сонымен бірге, ауруханадағы урология, таракальді хирургия, құлақ, тамақ және мұрын ауруларын емдеу бөлімдері жаңа технологияларды кеңінен қолдану барысында жақсы жетістіктерге қол жеткізуде.
Өмірдің қай саласы болмасын, білікті маманға жүктелетін жауапкершілік жүгі жеңіл емес. Бұл мәселенің әсіресе, денсаулық сақтау саласында салмағы ерекше артатыны да ақиқат. Өйткені, медицинада біліксіз маман қателігінің орны ешқашан толмайды. Осы өмірлік қағиданы басшылыққа алып, біз аурухана кешенінің білікті мамандармен қамтамасыз етілуін ерекше үлкен жауапкершілікпен жүзеге асырып келеміз. Бұл ретте жоғарыда аталған урология бөлімін басқаратын, бас дәрігердің хирургия саласы бойынша орынбасары Тимур Мұратовтың, таракальді хирургия бөлімінің жетекшісі Қайрат Жәркеевтің, лор бөлімінің жетекшісі Ермек Иманғалиевтің жаңашылдыққа негізделген ізденісті еңбектерін ерекше атап өткен жөн. №2 ауруханада қазіргі таңда 155 жоғары білімді дәрігерлер 300-ден астам орта буын медицина қызметкерлері еңбек етеді. Біз олардың кәсіби шеберлігін шыңдап, астаналықтардың денсаулығын қорғау жолындағы қалтқысыз қызметтерінің сапалы болуы үшін қолдан келгеннің бәрін жасаймыз.
Осындай тыңғылықты тәртіппен жан-жақты ойластырылып жасалған шаралардың арқасында қазір біздің №2 қалалық аурухана тек қана шипалы емдеу шараларын атқарып қоймайды, сонымен бірге, еліміздің денсаулық сақтау саласының негізіне айналатын инновациялық технологияларды енгізетін ғылыми шеберлік орталыққа айналуда. Осы орайда, қала әкімі Иманғали Тасмағамбетовтің, Денсаулық сақтау министрі Салидат Қайырбекованың тарапынан біздің ауруханамызға көрсетіп отырған шын мәніндегі нәтижелі көмектеріне шынайы алғысымызды білдіреміз.
Мақсат ЖАНТҰРҒАНОВ,
№2 қалалық аурухананың бас дәрігері, медицина ғылымдарының кандидаты.