Ақтауда уақыт талабына сай логистикалық орталық салынады

АСТАНА. 2 шілде. Ақтауда Қазақстан мен Әзербайжан Президенттерінің келісімі шеңберінде ірі логистикалық орталық салынбақ. Бұл туралы «24kz» хабарлады. Маңғыстау облысының әкімі Алик Айдарбаев: «Бүгінгі таңда «Ақтау теңіз порты» арнайы экономикалық аймағында 23 ірі компания қызмет етуде. Солардың ішінде үлкен диаметрлі құбырлар шығаратын «Арселор миттал Ақтау» зауыты, темір конструкцияларын шығаратын «Кеппел Қазақстан» және испандық «Индекс» компаниялары ірі жобаларды іске асыруды бастап жатыр. Сол компаниялардың қатарына, міне, бүгін тағы да бір ірі жоба қосылғалы тұр», – деді. Құны 14 млн. еуро тұратын аталған инвестициялық жоба «Азерсун холдинг» компаниясына тиесілі. «Азерсун логистика және өндіріс орталығы» елімізге келетін тауарлар мен елден экспортталатын өнімдерді қабылдап, сақтап, оны теміржол мен теңіз арқылы жөнелту жұмыстарын атқаратын болады. Мұнда әлемдік логистика өндірісінің ең соңғы үлгідегі технологиялары қолданылмақ. Мамандардың айтуынша, ірге тасы қаланып отырған логистикалық орталық елдегі шағын және орта бизнестің дамуына, кәсіпкерліктің өркендеуіне мол үлес қосады. Сондай-ақ, ол Маңғыстау өңіріндегі азық-түлік қауіпсіздігін қамтамасыз етуге мүмкіндік береді. Бұған қоса, шөлейтті аймақ тұрғындары нарықтағыдан арзан әрі сапалы көкөніс пен жеміс-жидекке қолы жеткізетін болады. Ал өз кезегінде Әзербайжан Экономика және өнеркәсіп министрі Шахин Мұстафаев: «Бұл – екі елдің басшыларының тікелей тапсырмасы арқылы өзара келісім негізінде туындаған жоба. Қысқа мерзім ішінде қазақстандық тараппен өзара әріптестік меморандумына қол қойылды. Бұл нысан мемлекеттеріміздің экономикасындағы мұнай-газ саласынан тыс секторлардың дамуына зор ықпалын тигізеді деген ойдамыз», – деді. Жолдыбай Базар. Дереккөз: «24kz». Фото: news.delovoimir.kz.