Жұрттың «қаржыңды еселеп береміз», «тиімді шартпен тауар немесе несие алуға мүмкіндігіңіз бар» дегенде құлай түсетінін біліп елдің тапқан-таянғанын сыпырып алып отырғандардың дені шекараның арғы жағындағылар. Одан қалды полиция қызметкері болып «жақыныңыз қылмыс жасады, мынадай көлемде ақша берсеңіз, мәселені ың-шыңсыз шешеміз» деп те телефон шалатындар бар.
Облыстық полиция департаменті криминалды полиция басқармасы бастығының орынбасары Рустам Сайділдинов қазір интернет алаяқтық әлемді әбігерге салып отырған мәселе екендігін айтады.
– Жыл басынан бергі алаяқтық қылмыстар көрсеткіші өткен жылмен салыстырғанда 64 пайызға төмендеген. Екі айдағы тіркелген 29 деректің 23-і интернет алаяқтыққа қатысты болып отыр. Бұл бағыттағы қылмыс жасаған жанды табу қиын, анықталғанмен де желі арқылы жасалған шым-шытырық шырғалаңның шетіне шығу оңай емес. Сондықтан да тергеу жұмыстары ұзаққа созылады.
Халық интернеттегі алаяқтарға алданып қалмауы үшін Қаржы нарығын реттеу және дамыту агенттігі ІІМ-нің өңірлік департаменттерімен бірлесіп «Fingramota.kz» атауымен ресми сайт әзірленіп, көпшілік назарына ұсынып отыр. Күнделікті әлеуметтік желілерде түсіндірмелік мақалалар мен профилактикалық бейнероликтер жариялаймыз. Мұндай қылмысты болдырмаудың басты жолы – мұқияттылық. Тұрғындардан жеке куәлік деректерін, төлем карталары мәліметтерін пайдалануда абай болуға шақырамыз, – дейді ол.
Облыс бойынша жыл басынан бері тіркелген 29 деректің онына қатысты тергеу амалдары аяқталып, сотқа жолданыпты.
Естеріңізге сала кетейік, «Fingramota.kz» ақпараттық-түсіндірме сайты – Қаржы нарығын реттеу және дамыту агенттігінің халықтың қаржылық сауатын арттыру мақсатында іске қосқан жобаларының бірі. Қаржы жаңалықтары, оқыту роликтері, бейнелі ақпараттық графикасы және қаржылық сауаттылық бойынша басқа да ақпараты бар бірегей алаң қаржылық сауат деңгейі және қаржылық мүмкіндіктері әртүрлі ауқымды аудиторияға арналған.
ҚЫЗЫЛОРДА
