Азия кубогіне баланған дәстүрлі жарыста Қазақстаннан бөлек, Грузия, Латвия, АҚШ, Қырғызстан, Өзбекстан, Моңғолия, Тәжікстан, Грекия, Түрікменстан және Гонконгтен келген балғын балуандар бақ сынады. Алғашқы екі күнде кадеттер күш сынасты. Бұл бәсекеде еліміз құрамасы алдына жан салмады. Күміс пен қола медальдарды есептемегенде, тоғыз өреніміздің жеңіс тұғырының ең биік сатысына көтерілуі жергілікті жанкүйерлерді ерекше желпіндірді. Солардың арасынан Досбол Балғабай (81 кг), Шерхан Алпанов (+90 кг), Сәулемай Сағитжан (70 кг) және Гүлдана Теңгебаева (+70 кг) сынды жас өрендердің дара талантымен оқшауланғанын да айта кеткен абзал. Ал өзбектер бас жүлденің бесеуін олжаласа, тағы екеуі моңғолдарға бұйырды.
