Осы ұлттық ұстанымымызды ұрпағымыздың бойына сіңіріп, салт-дәстүрімізді жаңғырту мақсатында Жамбыл ауданы Беріктас ауылында тұратын ақсамайлы әжелердің ұйытқы болуымен өтетін дәстүрлі іс-шара жыл сайын жібін үзбей жалғасып келеді. Осы үрдіске орай, жуырда 160-қа жуық ауылдағы абысындар жиылып, Наурыз мерекесін атап өтті. Беріктас ауылындағы Бекболат бабадан тарайтын жеті тармақтың ұрпағы бүгінде 200-ге жуықтапты. Әулеттің ең үлкен анасы Бейсенкүл мен Бикамал апалар жас келіндерге өмірдегі көрген-білгендері мен ойға түйгендерін айтып, ақыл-кеңестерін берді.
Зерлі кимешегі жарасқан әжелеріміз «Қамажай» биін билесе, ізінен ілескен жас келіндер халық әндерін шырқап, мерекенің сән-салтанатын арттырды. Қазан мен қаламын тең ұстап, қара өлеңге жүйрік өнерлі келіндер жүректен шыққан жырларын оқып, көптің қошеметіне бөленді.
– «Абысын асы» осы күні ұмыт бола бастады. Уыста ұстатпайтын уақыттың тапшылығынан бір-бірін айлап емес, жылдап көрмейтін жағдайға жеттік. Қазақта «Бармасаң, келмесең жат боласың» деп бекер айтпаған. Абысын араласпай, татулығына сызат түссе, ағайынның арасы алшақтайды. Бірге туған балалар бір-біріне жатқа айналады. Сондықтан осы береке-бірлігіміздің бастауы болар дәстүрімізді жас келіндер жалғастырады деген үміттеміз, – деген абысындар басқосуының бастамашысы, зейнеткер ұстаз Алтынкүл Қилыбаева ақ батасын берді.
Алматы облысы
