Белсенді өмірге бел шеше кіріс!

«Сөзден – іске» деген ұранмен ұйымдастырылған акцияда Ден­саулық сақтау министрі Ажар Ғи­ният, Мәдениет және спорт вице-министрі Сәрсен Құранбек, Дүние­жүзілік денсаулық сақтау ұйымының өкілі, ұйымның елдегі кеңсесінің басшысы Скен­дер Сыла да төбе көрсетіп, көп­тің ортасынан табылды. Таң­ғы жаттығуға кіріспес бұрын Денсаулық сақтау министрі Ажар Ғиният Дүниежүзілік ден­сау­лық күнінің мән-маңызы туралы ой қозғап, атаулы күнде ең әуелі елді саламатты өмір салтын ұста­нуға шақыру өзекті екенін айтты. Расында солай, «Ауырып ем іздеген­­ше, ауырмаудың жолын ізде­ген» әлдеқайда тиімді.

– Бүгінгі акцияға саламатты өмір салтын ұстанудың ден­саулыққа пайдасы көл-көсір екенін түсінетін қауым жиылды деп білеміз. Мұндай іс-ша­ралар еліміздің барлық өңірінде өтіп жатыр. 1950 жылдан бастап 7 сәуір – Денсаулық күні аталып өтеді. Бағалау қоры­тындысы бойынша былтыр ере­сек­тердің тек 18%-ы ғана аптасына 150 минуттан ар­тық шы­нығатыны белгілі болды. Биыл Дүниежүзілік денсаулық күні «Баршаға денсаулық» ұра­нымен өтіп жатыр. Дені сау ұрпақ қалыптастыру – елдің басты ұста­нымы. Инфекциялық емес ауру­лардың алдын алуда саламатты өмір салтын ұстанып, дұрыс тамақтану, физикалық белсенділікті арттырып, зиянды әдеттерден арылу маңызды, – деген А.Ғиният қала тұрғындарын денсаулыққа бейжай қарамай, профилактикалық скринингтік тексеруден уақтылы өтуге ша­қырды.

Ізін ала Дүниежүзілік ден­саулық сақтау ұйымының өкілі Скендер Сыла Қазақстан Үкі­метінің қоғамдық денсаулық сақтау саласындағы инновацияларды қолдауға ерекше мән беріп отырғанын атап өтті.

– «Дені сау ұлт» және «Адам­дар­дың денсаулығы мен әл-ауқатын нығайту үшін ауылдық денсаулық сақтауды жаңғырту» ұлттық жобаларын іске асыру жаңа Қазақстанның дамуына өз үлесін қосады. Дүниежүзілік денсаулық сақтау ұйымы не­гізгі бастамалардың ұлттық жос­парларға инте­грациялануын жоғары баға­лайды және тех­никалық және әдіснамалық қолдау көрсетуді жал­ғастырады. Президент Қасым-Жомарт Тоқаев міндетті әлеуметтік медициналық сақтандыру сапасын жақсартуға, денсаулық сақтау саласындағы мамандардың мәртебесін арт­тыруға және олардың құқығын қорғауға ерекше назар аударады. Біз денсаулықты нығайтуға, бейбітшілікті сақтауға үн қосып, әлеуметтік осал топтардың игі­лігі үшін қызмет етуді жалғас­тырамыз», дейді С.Сыла.

Бұдан соң саябаққа жинал­­ған қауым Астана медицина­лық университетінің жаттықты­рушысы, еркін күрес­тен спорт ше­бері Сергей Глу­шен­комен бір­ге дене қыз­дыр­атын жаттығуға кірі­сіп, кейін қашық­тыққа жү­гірді.

Әлемдік зерттеулерге сүйенер болсақ, физикалық белсенділіктің аздығынан ауруға шалдығып, мезгілсіз қайтыс болғандар көп. Физи­калық белсенділіктің азды­ғынан ауырып, өмірімен қош­тастандар әлемдегі өлім-жітімнің 6%ын құрайды екен. Одан кейінгі сатыда жоғары қан қысымы (13%), темекі шегу (9%) және қандағы глюкозаның жоғары дең­гейі (6%) тұр. Сонымен қатар артық салмақ пен семіздік әлемдегі өлім-жітімнің 5%-ын құрайды. Осы көрсеткіштер сайып келгенде саламатты өмір салтын ұстанбай, аурудың алдын алмағаннан өршіп тұр. Әрине, әр адам өз денсаулығына өзі жа­уапты. Ендеше, Денсаулық күнінде саябаққа жиналған жас­тар да көкейге көп нәрсе түйді деп сенеміз.

Ақпарат үшін еске салсақ, Дүниежүзілік денсаулық күніне орай елордада А.Байтұрсынұлы атындағы Binom school-да «Ден­­саулық сабағы» ашық са­бағы өтсе, № 9 қалалық ем­ханада «Ашық есік күні» ұйым­дастырылды. Сондай-ақ Ден­саулық сақтау министрлігі, Дүниежүзілік денсаулық сақтау ұйымының өкілдері Астана медицина университетінің сту­денттерімен кездесті.