Жарыстың алғашқы күні бес салмақ дәрежесі бойынша түрлі-түсті жүлделер сарапқа салынды. Біздің балуандар арасында ең үздік көрсеткішке Нұрсұлтан Тұрсынов қол жеткізді. 87 кг салмақта сайысқа түскен Семей өңірінің тумасы ширек финалда әлем чемпионатының екі дүркін жүлдегері, Азия чемпионы, Ислам ынтымақтастығы ойындарының жеңімпазы, өзбекстандық Жалғасбай Бердімұратовты айқын басымдықпен жеңсе, жартылай финалда құрлық біріншілігінің үш дүркін күміс жүлдегері, қырғызстандық Атабек Әзизбековтің тас-талқанын шығарды. Бірақ шешуші тұста Тұрсыновтың Насер Гасем Әлизадеге әлі жетпеді. Азияның үш дүркін чемпионы деген атағы бар Иран спортшысы қандасымызды еш қиналмай жеңді. Бұл – Нұрсұлтанның аталған жарыстағы төртінші жүлдесі. Бұған дейін ол бір алтын (2014 жылы), бір күміс (2015 жылы) және бір қола (2022 жылы) медаль иеленген еді.
Бастапқы белдесулерінің бірінде Өзбекстанның атақты балуаны, әлем чемпионатының күміс жүлдегері Арам Варданянның аяғын көктен келтіргенде, 77 кг салмақтағы Демеу Жардыраев Астанада алысқа шабатын шығар деп ойладық. Алайда келесі кездесуінде ол ирандық Әмин Явар Кавиянинажадқа есе жіберіп, бас жүлде үшін таласу мүмкіндігінен айырылды. Үшінші орын үшін тартыста ардагер балуанымыз қытайлық Руи Лиуге жол беріп, жергілікті жанкүйерлерді жерге қаратты.
Былтырғы Азия чемпионатында күміс медальді мойнына ілген аса жеңіл салмақтағы Аманғали Бекболатов бұл жолы үздік үштікті түйіндеді. 63 кг салмақта күш сынасқан Мұхаметәли Мамырбек те дәл сол межеден көрінді. Бұрындары жастар арасындағы түрлі жарыста жасындай жарқылдаған дарынды балуанның бұл – ересектер сайысындағы алғашқы табысы. Алыптармен айқасқан Әлімхан Сыздықов та қола жүлдені қанағат тұтты.
Сөйтіп, жарыстың алғашқы күнін еліміздің грек-рим күресі шеберлері 1 күміс және 3 қола медальмен қорытындылады. Бас жүлденің төртеуін Иранның пехлевандары жеңіп алды. Олар – Пойя Сулат Дад Марз (55 кг), Има Хоссейн Мохамади (63 кг), Насер Гасем Әлизаде (87 кг) және Әмин Мырзазаде (130 кг). Тағы бір алтын медаль қырғыздың бас балуаны Ақжол Махмұдовтың (77 кг) мойнында жарқырады.
