Дин дес берер емес
Шахматтан әлем тәжіне үміткер қытайлық Дин Лижэнь барша жанкүйер мен сарапшыларды таңғалдырып, төртінші партияда әлем чемпионатындағы алғашқы жеңісіне қол жеткізді. Бәсекені ағылшындық жүріспен бастаған Дин ресейлік гроссмейстерді 47-жүріске келгенде құрығына түсіріп, төрт сағатқа жалғасқан матчта басым түсті.
Екінші партияда ақ тастармен ойнап, қарсыласына жол берген Дин Лижэнь бұл жолы қателескен жоқ. Дегенмен ол төртінші партияда да әдетінен жаңылмай, көп уақытын өз бөлмесінде өткізіп, жүріс жасау кезінде ұзақ ойланды. Ал Ян Непомнящий болса, өзіне өте сенімді ойнады.
Алғашқы жүрісті жасаған Дин бұл жолы өзінің қалыпты жүрісінен бас тартып, бірінші қадамын c4 пен бастады. Ал Непомнящий бұған Nf6 жүрісімен жауап қайтарды. Он бірінші қадамға дейін гроссмейстерлер көпшілік аса таңғалатындай жүріс жасаған жоқ. Өйткені екеуі де румыниялық шахматшы, осы әлем чемпионатындағы қытайлық шахматшының секунданты Рихард Раппорт пен германиялық Илья Зарагацкийдің 2013 жылы ойнаған партиясының жүрісін қайталаумен болды.
Ал 28-жүріске келгенде Ян небәрі екі минут қана ойланып, Кd4 жүрісін жасағанда, шахмат мамандары Непомнящийдің өрескел қате жібергенін айтты. Ал 47-жүрістен кейін ресейлік гроссмейстер жеңілгенін мойындамасқа амалы қалмады. Төртінші партиядан кейінгі баспасөз мәслихатында Дин: «Жеңіске жеткеніме қуаныштымын. Өте қиын матч болды, бірақ ойын тізгінін өз қолымда ұстап, маңызды жеңіске қол жеткіздім. 29-жүрісімді жасағаннан кейін бұл партияда жеңіске жететінімді білдім», деді қытайлық шахматшы.
Ал Ян Непомнящий матчтың әдеттегідей өте тартысты өткенін айтып, 15-қадамнан кейін өз позициясын дұрыс бағамдай алмағанын мойындады.
Янның ойластырған қадамы
Рет бойынша 5-партияны Ян Непомнящий ақ тастармен бастады. Ол бірінші партиядағыдай бұл бәсекені де испаниялық жүріспен ашып берді. Алғашқы жүрістерді қарсыластар тез-тез жасап, позицияға кіргенде көбірек ойлана бастады. Әсіресе, қара тастармен ойнаған қытайлық шахматшы әр жүрісін өте ұзақ ойланып жасады. Ал ресейлік Непомнящий төртінші турда жеңілістің кермек дәмін татса да, бесінші партияда жүрістерін өте жылдам жасап отырғаны баршаны таңғалдырды.
Қытайлық гроссмейстер бесінші партия барысында айтарлықтай қателіктерге жол берген жоқ, бірақ әр жүріс сайын позициясы нашарлай бастағанын іштей сезіп отырды. Ал Ян мұндай сәтте орталық алаңды күшейтіп, ойынды өз бақылауында ұстауға тырысты. Әйтсе де, 30-жүрістен кейін Непомнящий айқын басымдыққа ие бола бастады. Дин соңына дейін қарсылық көрсетуге тырысқанымен, 48-жүрістен кейін өз жеңілісін мойындады.
– Бүкіл матч бойы қорғаныста ойнау оңай болған жоқ. 29-жүрісте жасаған қателігім ойын тағдырын шешіп кетті десем де болады. Осыдан кейін менің барлық позициям әлсіреп қалды, – деді Дин Лижэнь.
Ал Непомнящий алғашқы жүрістер дайындық барысында алдын ала ойластырылған қадамдар болғанын және соның арқасында матч бойы бірнеше сәтті позицияда ойнағанын айтты.
Газет беттеліп жатқанда әлем тәжіне үміткер шахматшылар өздерінің алтыншы партиясын ойнап жатқан болатын. Ал гроссмейстерлер бүгін төртінші демалыс күнін тиімді өткізуге тырысып жатыр.
