Суреттерді түсірген Ерлан ОМАР, «EQ»
Мәселен, науқастарға күрделі операция жасап жүргендердің қатарында атыраулық дәрігерлер де бар. Облыстық ауруханадағы гинекология бөлімшесінің меңгерушісі Жанаргүл Бекенованың айтуынша, жыл басында қабылдау бөлімшесіне келген 53 жастағы әйел түскен.
«Сол кезде науқас ішкі ағзасының ауырғаны туралы шағым айтты. Жүрегі айнып, құсқан. Ағзасында әлсіздік, бас айналғаны байқалды. Жыныс жолынан қан кеткен. Біздің бөлімше дәрігерлері науқасты толық тексеруден өткізді. Оның қорытындысымен науқасқа «Жатырдың алып миомасы. Түйін некрозы, орташа анемия» диагнозы қойылды», дейді Ж.Бекенова.
Миома – жатырдың қатерлі емес ісігі. Бірақ мұндай ісікпен жүру қиындық тудырады. Адам ағзасына кері әсері бар. Сол себептен бөлімше меңгерушісінің жетекшілігімен гинеколог дәрігерлер Інкәр Ондасынова мен Мақсат Туғанбаев науқастың жатырына операция жасап, салмағы 8 кг миоманы алып тастаған.
Ал облыстық онкология диспансерінде қатерлі ісікке шалдыққан 59 жастағы науқасқа жасалған күрделі операция сәтті аяқталды. Диспансер директоры Элмира Сапарованың айтуынша, операцияға дейін науқасқа «ретроперитонеум саркомасы» диагнозын қойылған. Онкология диспансеріндегі күрделі операцияны хирургия бөлімінің меңгерушісі Мақсат Шәмшенов пен облыстық кардиоорталықтың қан тамырлар хирургі Ерлан Мәдешев жасады. Хирургтерге ассистенттер Мерей Қазғалиев пен Мақсат Туғанбаев, Мейрамгүл Игібаева, анестезиолог Алиакбар Имаматдинов көмектесті.
«Науқасқа жасалған күрделі операция ортаңғы лапаротомия деп аталады. Хирургтер анастомоздарды қою арқылы науқастың денесінен бірнеше ісікті алып тастаған. Оның ішінде сыртқы мықын артериясы мен сол жақтағы несепағардың төменгі үштен бір бөлігін резекциялау арқылы алынған үлкен ретроперитонеальді ісіктер бар. Ең үлкен ісіктің салмағы – 15 кг», дейді Э.Сапарова.
Атырау облысы
