Әлем • 18 Сәуір, 2023

Қарақшыларды қапы қалдырған жігіт

326 рет
көрсетілді
2 мин
оқу үшін

Әлеуметтік желілерде АҚШ-та тұратын Қазақстан азаматына қарақшылардың шабуыл жасағаны, ал отандасымыздың оларға тойтарыс беріп, қаруларын тартып алғаны түсірілген бейнежазба жарияланды. Оқиға желісін кейіпкер – Олжас Қаныбек Instagram парақшасында баян­дады. Сыртқы істер министрлігі де осыған қатысты ресми мәлімет берді.

Қарақшыларды қапы қалдырған жігіт

Оқиға АҚШ-тың Майами қала­сын­да болған. Жергілікті үш адамнан құралған топ Олжас Қаныбекке тапанша кезеп, сөмкесін тартып алмақшы болған. Олжастың айтуынша, сөмкесінде құжаттары, телефоны мен ақшасы бар екен. Ол бұзақылардың біріне қуып жетіп, қаруын тартып алған. Қарақ­шының екі досы оны босату үшін қайта оралған екен. Қарулы қарақшылар оған ша­буыл жасаған. Алайда Олжас қарсылық көрсетіп, олардың да қаруларын тартып алған. Кейін қарақшылар оқиға орнынан ізін суытқан.

Көп ұзамай оқиға орнына полицейлер келеді. Қарақшыларды іздеуге 6 полиция көлігі мен тікұшақ шыққан. «Бетіме тапанша тақағанда қорқып кеттім. Бірақ қарақшыларға сыр алдырған жоқпын. Келген полиция қыз­мет­керлері де «не деген жүрегінің түгі бар жігітсің» деп таңғалып жатыр», дейді Олжас Қаныбек.

Оқиға орнына психологтер мен дәрігер де келіп, Олжастың жағдайын тексеріпті. Сондай-ақ киімдерін ДНҚ сараптамасына тексеруге жіберген. «Қазақ жі­гіті қарақшылардан тапанша пен автоматты тартып алған, өзде­рін ұрып-соққан, бірінің тісін сын­дыр­ған. Мұндайды АҚШ-та бұған дейін ешкім көрмеген», дейді по­лицейлердің бірі.

Олжастың айтуынша, оқыс жағ­дай күтпеген жерден болған. Ол жар­нама бөліміне барып, телефонындағы арнайы қосымшаны жаңартпақ болған екен. Алайда оны тапаншамен үш жігіт күтіп алған.

Еліміздің АҚШ-тағы кон­сул­дығы Олжаспен байла­нысқа шыққан. «Біздің консул Қазақ­стан азаматын тауып, онымен және жергілікті құқық қорғау органдарымен байланысты. Төбелес барысында кішігірім жарақат алға­нына қарамастан, Олжас ем қа­был­дау­дан бас тартты. Оның ден­сау­лы­ғы­на еш қауіп жоқ. Аман-есен», деді СІМ ресми өкілі Айбек Смадияров.

СІМ мәліметі бойынша Олжас Қаныбек АҚШ-қа 2 айлық оқуға барған. Ол Латвияда аэронавигация институтында оқыған. Мамандығы – авиадиспетчер. Кезінде бокспен де айналысқан екен. 24 жастағы отан­дасымыз – Кентау қаласының тума­сы. «Бұрын мұнай-газ саласында жұмыс істедім. Кейінгі уақытта авиация саласында оқып жүрмін. «Қазаэронавигация» компаниясы ұшуды практикалық түрде үйрену үшін АҚШ-қа оқуға жіберді. Қазір Майами қаласындамын», дейді Олжас Қаныбек.