![Қарағанды облысы: Шекті өлшемнен шыққан жоқ](/media/2023/04/19/images-2.jpeg)
Энергетика министрлігінің бұйрығына сәйкес АИ-92 және АИ-93 маркалы жанармайдың бір литрі – 205 теңгеге дейін, ал дизель отыны – 295 теңгеге дейін саудалануға тиіс десек, Қарағанды облысындағы жанармай бекеттері осы шекте. Барлық дерлік жанармай бекеттерінде көтерілген баға бірқалыпты.
Мәселен, Sinooil жанармай бекеттерінде АИ-92 литрі – 205 теңге, АИ-95 – 215 теңге. Дәл осындай баға Helios жанармай құю стансаларында. Яғни 205 теңгеден. Атап айтқанда, АИ- 92 – 205 теңге, АИ-95 – 215 теңге. Дизель – 295 теңге.
Gazoil жанармай стансаларында баға әзірге өскен жоқ. Менеджерлердің мәлімдеуінше, АИ-92-нің литрі – 181 теңге, АИ-95 – 212 теңге. Өзге де ұсақ жанармай бекеттердегі баға да бекітілген прайс көлемінде.
Ал ауыл шаруашылығы басқармасының мәліметінше, шаруашылықтарға дизель ақпан айында 206 теңгеден жеткізілсе, сәуір, мамыр, маусым айында 210 теңгеден тасымалданбақшы.
– Көктемгі егіс науқанына бөлінген дизель шаруаларға тасымалдаушы оператор арқылы («Retail Trade Oil» ЖШС) Павлодар мұнай өңдеу зауытынан кестеге сәйкес жеткізілуде. Бүгінде ақпан-сәуір айларына бөлінген 12 мың тоннаға қаржы оператор тарапынан толық төленіп, 6 мың тоннасы тасылып алынды. 9 мың 225 тоннаны жеткізуге 252 шаруашылықпен шарт жасалды, дейді басқарма басшысы Асқар Санаубаров.
Жалпы, Қарағанды шаруаларына қажетті дизельдің технологиялық картаға сәйкес көлемі 20 мың тоннадан асады екен.