Қазіргі күні АИ-92 бензині бойынша ең төменгі бағаны «Монолит» (литрі 178 теңге) пен «Қазақойл» (182 теңге) стансалары ұсынып отыр. Дегенмен талон түрінде алсаңыз литрі кемінде 200 теңгеден сатылады. Яғни бұл компаниялар алдағы уақытта сұйық отынның бағасын өсіретініне күмән жоқ.
Ал «Гелиос», «Пегас», «Газпромнефть» бағаны көтеріп тастады. Ең қымбат бензин «Газпромнефть» стансаларында тіркелді (литрі – 205 теңге). Атаулы бензиннің литрі «Гелиоста» - 201, «Пегаста» 199 теңге тұрады. «Петрол» мен «Парковая» компаниялары автокөлік отынының бағасын сәйкесінше 185 және 192 теңге деңгейінде ұстағанымен, бұлада дизель отыны жоқ.
Ертістің Павлодар өңірі бір айда шамамен 9-10 мың тонна дизель, 7 мың тонна бензин тұтынады. Өңір бойынша 147 жанармай құю стансасы бар болса, бөлшек саудадағы ең ірілері – «Монолит» (14 стансасы бар), «Петрол» (11), «Пегас» (15), «Гелиос» (21), «Қазақойл» (14) және «Газпромнефть» (3) желілері. «Қазақойл» операторы жанар-жағармайды толықтай «Қазмұнайгаздан», өзгелері «PETROSUN» серіктестігінен алады.
