Енді «Dronekazakhstan» арнасы ұшқышсыз ұшу аппарат иелеріне еліміздегі әуе кеңістігін пайдалану бойынша кеңес беріп, тиісті заң мәселелеріне байланысты жәрдем көрсетеді. Сондай-ақ салалық нормативтік актілердегі өзгерістер мен ұшу жөніндегі шектеулер туралы хабардар етіп отырады. Telegram-дағы арнаны Индустрия және инфрақұрылымдық даму министрлігінің Азаматтық авиация комитеті еліміздегі авиация әкімшілігімен бірлесіп ашқан.
«Dronekazakhstan» ұшқышсыз ұшу аппаратын қолданып жүрген барлық азаматқа пайдалы болмақ. Өйткені мұнда қажетті мәліметтер мен түсініктемелер, сондай-ақ осы аппараттардың қолданылуын реттейтін нормативтік-құқықтық актілердегі өзгерістер туралы ақпарат жарияланады. Бұдан бөлек, еліміздің авиациялық билік орындары бұл арқылы дрон иелерін ұшуға тыйым салынған аймақтар бойынша үйлестіріп, өңірлерде өтетін ауқымды іс-шаралардың жоспарына байланысты уақытша шектеулерді құлағдар етеді. Ұшқышсыз ұшу аппаратын қолданатын азаматтар арнаға өздерін толғандырған сұрақтарды жолдап, құзырлы органдар тарапынан жауап алады.
«Біз аталған арнаны ұшқышсыз ұшу аппаратымен жұмыс істейтін жеке және заңды тұлғалармен өзара іс-қимыл жасау үшін құрып отырмыз. Өзекті мәселелерді ашық талқылауға дайынбыз. Мұнда барлық сұрақты қоюға болады. Оған Азаматтық авиация комитеті мен еліміздегі авиация әкімшілігінің қызметкерлері жауап беруге дайын», дейді арна авторлары.
Сондай-ақ жоба жетекшілері жаңа арнаның жұмысында қандай да бір кемшіліктер туындаған жағдайда оған түсіністікпен қарауға шақырды. Қазірдің өзінде аталған арнада ұшуға тыйым салынған аймақтардың тізімі, ұшқышсыз ұшу аппаратын еліміздің әуе кеңістігінде пайдалануды реттеп, есепке қою мен нормативтік құқықтық актілерге қатысты ережелер орналастырылған. Сонымен қатар мақсатты аудиторияға «Қазаэронавигация» сайтын пайдалана отырып, интернет пен v3.0 телефон байланысы арқылы ұшу жоспарларын ұсынудың тәртібі түсіндірілді.
