Қарағанды облысы әкімінің орынбасары Ермек Алпысов пен «Kazakhmys Holding» ЖШС ESG жобасының жетекшісі Сәкен Шаяхметов қолымен бекіген өзара ынтымақтастықты нығайтатын құжатта көптеген әлеуметтік мәселелер қамтылған.
Бұл меморандум арқылы «Қазақмыс» корпорациясы өзі кен игерген аудан-қалада бірқатар жобаларды іске асырады. Яғни сол өңірлердің инфрақұрылымын дамытып, абаттандырылуына көмек беруі тиіс.
Соның арасында Балқаш қаласы бірінші кезекте. Балқаш табанынан кен өндіруші компания алдағы кезеңде шаһардың тыныс-тіршілігіне ықпал етер міндеттеме алды.
Атап айтқанда, таяу жылдары Балқашта бас кәріз коллекторының 2,1 шақырымды апаттық учаскесі корпорация тарапынан ағымдағы жөндеуден өтеді. Бұрынғы емхана ғимараты да қайта жаңарып, балабақша ретінде іске қосылатын болады. Урбанистика орталығымен бірлесіп, қаланы абаттандыру жобалары ел игілігіне беріледі. Сондай-ақ «Қазақмыс» корпорациясы Балқаш қаласының тіршілікті қамтамасыз ету желілерінің кейбіреуінің жобалық-сметалық құжаттамасын қаржыландырады.
Меморандумда «Қазақмыс» үлес қосатын басқа да жобалар бар. Оның ішінде, компания Қарқаралы ауданы Абыз ауылындағы мектепті жөндеуге қолдау көрсетеді. Ақтау кентіндегі бес қабатты екі үйдің шатырын жөндеу де олардың алдағы жоспарына іліккен.
Жалпы, әлеуметтік әріптестік туралы меморандумға қол қою өңірдің дамуына серпін береді деп күтілуде.
Қарағанды облысы
