Ұлт өнеріне өлшеусіз үлес қосқан өнерпаздың есімін еске алған Естай ауылының жастары бірқатар шарапатты іс-шараны жүзеге асырды. Дәлірек айтсақ, С.Мүткенов атындағы жалпы орта білім беретін мектепте «Ардақтайық Сарыарқаның асылын» тақырыбында Естай ақынның өмірбаяны мен шығармашылығына, әндерінің тарихына арналған ғылыми жобалар сайысы өтті. Жобалар сайысында 1-орынды Гүлнар Сәрсен алса, 2-орынды Қызғалдақ Оразғали еншіледі, 3-орын Ерболат Нұрбайға бұйырды. Жүлделі болған оқушыларды ынталандыру мақсатында Естай ауылының жастары ақшалай сый-сияпат табыстады.
Мектеп директоры Райгүл Тұрсынбайқызы шәкірттердің шабытын оятып, талабын ұштауға үлес қосқан Естай ауылының жастарына ризашылығын білдірді.
«Қазақта «Туған жерге туыңды тік» деген жақсы сөз бар. Осы бір тәлімді тәмсілді ауызбен айтып қана қоймай, іс жүзіне асырған жастардың әсерлі әрекеті бәрімізді сүйсінтті. Бір кездері өзіміздің ауылдан білім алып, қанат қаққан оқушыларымыздың туған жерге ат басын бұрып, бүгінгі атқарған шаруалары ертеңгі балдырғандарға үлгі болары анық», деді ол.
Сонымен қатар Естай есімін ұлықтап, жастар арасында насихаттау мақсатында шағын футболдан турнир өтті. Естай Беркімбайұлының кесенесіне барып, құран бағыштаудан басталған игілікті іс-шара кешке дейін жалғасты.
Тоқсан ауыз сөздің тобықтай түйіні, ұйымдастырылған іс-шаралардың барлығы Естай Беркімбайұлының есімін жаңғыртуға, ұлт жадынан өшірмеуге бағытталды.
Рауан ҚАЙДАР,
журналист
Павлодар облысы
