Министрдің айтуынша, еліміздегі мәдениет, спорт, туризм және кино саласында өсу үрдісі байқалады. Жақында мәдениет саласындағы саясатты іске асырудың 2023-2029 жылдарға арналған тұжырымдамасы бекітілген. Онда іске асырылатын негізгі мақсаттар айқындалып отыр.
– Елімізде бірнеше тұғырлы тұлғаның мерейтойын кеңінен атап өту жоспары бар. Нақтылай айтқанда, даңқты қолбасшы Сұлтан Бейбарыстың 800 жылдығы, көрнекті мемлекет қайраткері, ғалым Темірбек Жүргеновтің 125 жылдығын халықаралық деңгейде атап өтеді. Дешті Қыпшақ даласынан шыққан даңқты тұлғаның мерейтойына арналған халықаралық ғылыми-практикалық конференциялар, дөңгелек үстелдер, шығармашылық кештер, көрмелер ұйымдастыру қолға алынды. Жыл басталған сәтте Сұлтан Бейбарыстың есімі елорданың бір көшесіне берілді. Сонымен қатар күзде Қазақстанның Мысырдағы мәдениет күндерін өткізу жоспарда тұр. Оған Атырау облысының делегациясы барады. XXX Каир халықаралық қазіргі заманғы эксперименталды театр фестивалінде Атырау өнерінің қарашаңырағы – Махамбет атындағы академиялық қазақ драма театры көрнекті жазушы, драматург Рахымжан Отарбаевтың «Сұлтан Бейбарыс» спектаклін сахнаға шығарады. Республикалық айтыс, суретшілердің симпозиумы секілді мәдени іс-шаралар өтеді. Бұған облыстың мәдениет мекемелері дайындығын белсенді жүргізіп жатыр, деді министр.
Асхат Ораловтың айтуына қарағанда, Атырау облысында 2025 жылға дейін 20 спорт және денешынықтыру-сауықтыру кешендерінің құрылысын салу жоспарланыпты. Кездесуде өңір тұрғындары бірнеше мәселеге байланысты жобалар ұсынды. Әсіресе туризм саласын дамыту, мүгедектігі бар спортшыларға көңіл бөлу, арнайы жаттығу орнын салуға жер телімін беру, жеке спорт мектептерінде жаттығатын балаларды жарыстарға жіберуге қаржы қарастыру, футзалға арналған манеж салу секілді жобалар бар.
Министр Махамбет ауданындағы «Өнерпаз» аудандық мәдениет үйінің жұмысымен танысты. Мұнда Батыс Қазақстан облыстық Қадір Мырза Әлі атындағы мәдениет және өнер орталығының ұйымдастыруымен өтіп жатқан «Дала дидары» көшпелі концертіне қатысты.
– Қазақтың Қадірінің мұрасын өшірмей, көшпелі концерт ұйымдастырып жүрген орталықтың жұмысы көпке үлгі боларлықтай. Біз мұндай нысандарды облыс орталығына ғана емес, ауылдық жерлерде де көптеп салуымыз керек. Ауданда тұрғындар санының өсуіне байланысты мәдениет үйін кеңейту қажеттігіне көз жеткіздім. Сол себептен, бұл мекемеге жаңадан техникалық жабдықтар сатып алып беруге және 400 орындық мәдениет үйін салуға шешім қабылдадым, деді Асхат Оралов.
Бұл ауданда 1 мың орындық балалар-жасөспірімдер спорт мектебі бар. Нысан 2003 жылы салынып, 2017-2018 жылдары күрделі жөндеуден өткен. Қазір мұндағы бокс, волейбол, футбол, баскетбол, жеңіл атлетика, қазақ күресі, тоғызқұмалақ, дзюдо үйірмелеріне 720 оқушы қатысады. Спорт мектебінде 23 қызметкер жұмыс істейді, оның 9-ы – жаттықтырушы.
Ал Индер ауданындағы «Индер-Мәдениет» мәдениет үйінің ғимараты 2016 жылы салынған. Сыйымдылығы – 400 орын. Мұнда 86 адам жұмыс істейді, оның 55-і – мәдениет қызметкері, 29-ы – оркестр маманы, 31-і – техникалық қызметкер. Мәдениет үйінде домбыра және би үйірмесі бар. Бұған қоса Р.Ғабдиев атындағы халықтық ұлт аспаптар оркестрі, «Ару-Ана» халықтық әжелер ансамблі, «Ақжайық» халық театры, «Ақжайық» халықтық вокалды аспаптар ансамблі, «Әсем-ай» үлгілі би ансамблі, «Бойтұмар», «Бекзат» би ансамбльдері, «Атамұра» ағалар ансамблі және «Қарлығаш» үлгілі балалар хоры құрылған.
Индер аудандық жастар ресурстық орталығы ғимараты 1969 жылы пайдалануға берілгенімен, 2019 жылы ғана күрделі жөндеуден өткен. Орталықта 5 маман жұмыс істейді. Жастардың бос уақытын тиімді пайдалануды ұйымдастыру мақсатында үстел теннисі, бильярд тақтасы қойылған. Мұнда «Inderbor Cinema» кинотеатры 3 сеанспен көрермендер қабылдайды. Билеттерді «Tiketon.kz» сайтынан онлайн сатып алуға мүмкіндіктер қарастырылған. Билет құны балаларға – 500, студенттерге – 600-800, ересектерге – 1 200-1 800 теңге. Кинотеатр 130 көрерменге арналған.
Атырау облысы