Өнер • 11 Мамыр, 2023

Кенеп бетінде – көркемдік

381 рет
көрсетілді
2 мин
оқу үшін

Әдеттегідей Шығыстың бір топ суретшілері асай-мүсей­лерін арқалап, пленэрге шықты. Күн жылып, жер аяғы кеңи сала табиғат аясында этюд жазуды екі-үш жылдан бері олар дәстүрге айналдырған.

Кенеп бетінде – көркемдік

Суреттерді түсірген автор

Белгілі қылқалам шебері Құдаш Нұрсадықов бастаған суретшілер тобы былтыр Өс­кеменнің іргесіндегі бөртекке шықса, биыл сол жағалау сая­бағына барып жайғасты. Ат шаптырым аумақты алып жатқан абат бақтың іші сурет­шілер үшін таптырмас жер. Ер­тістің жағасы, орман-то­ғайдың саясы. Құстары сай­раған бау-бағы жайнаған.

Өнер музейімен бірлесе ұйымдастырылған бұл жолғы пленэрге Құдаш Нұрса­ды­қов­тың шәкірттері де қатысты. Олар акварельмен, майлы бояу­мен этюд жазып, өз баптарын сынады. Ал кәсіби суретшілер бір күнге созылған шарада екі этюдтен жазып үлгерді.

вап

– Табиғат аясында сурет салудың жөні бөлек. Нағыз шығармашылық жұмыс осы. Фотосуреттен көшіріп емес, табиғатта табан астында жа­зылған картина құнды. Оның теңгеге шаққандағы құны емес, шығармашылық бағасын айтып тұрмын, – дейді қылқалам шебері Ержан Тұрғанбаев.

Ертістің жағасына таяу тұрып, кенеп бетіне топтаса өскен теректерді бейнелеген Гүлнәр Миғражқызының да этю­ді ерекше көз тартты. Ен­ді-енді бүршік атып келе жат­қан теректердің кес­кіні ай­надай көлшікке тү­седі. Көл бетін сызғылай қос үй­рек жүзіп барады. Майлы бояумен жазған этюді мен таби­ғаттың үйлесіміне су­рет­­ші сәл шегіншектей барып, көзін сығырайта қара­ды. Кей­бір тұсын саусақ ұшы­мен тү­зеткен болды. Га­лереяға қоя салатындай дайын картина.

Сол сияқты жас сурет­ші Мәди Қайырхан да жұмысын сәтті аяқтады. Суретшілердің би­ылғы жоспары, пленэрге жүйелі түрде шығып, Шы­ғыс­тың көрікті жерлерін кенеп бетіне түсіру.

 

Шығыс Қазақстан облысы