Суретті түсірген Ерлан ОМАР, «EQ»
Бүгінде еліміздің тарихы мен мәдениеті бай, адамдардың рухани күш жинауға келетін орынға айналған қалада туризм кластерінің басым бағыты, көлік инфрақұрылымы қолайлы жолға қойылған. Халықаралық көлік магистралінің желісінде орналасқан көне шаһардың жаңаруы халықтың ізгі ниет-тілегінен туындаған өзгеріс деп білемін. Түркі дүниесінің рухани астанасы – Түркістанға тағзым ету үшін арнайы келген Президент Қасым-Жомарт Тоқаев көне қаланы еліміздің алтын бесігі, мәдениетіміз бен руханиятымыздың рәмізіне және бүкіл халқымыздың бойтұмарына балады. Бұл қасиетті жерді көздің қарашығындай сақтап, дамыту қажеттігін айтты. Облысты дамытудың 2024 жылға дейінгі әлеуметтік-экономикалық бас жоспарына сай 5 жылға 1 трлн 236 млрд теңге бөлінді. Бүгінгі қарқынды құрылыс, салынған инвестиция елдің игілігі үшін атқарылып жатқан дүние екені мәлім.
Қазір Түркістан қаласын дамытудың ІІ кезеңі жоспарлы жүзеге асырылып жатыр. Түркістан қаласының әкімі Нұрбол Тұрашбековтің ақпарат құралдарына берген дерегіне сүйенсек, биыл қаңтар-наурыз айларында киелі қалаға келушілер мен туристердің саны 130,5 мың адамға жеткен, яғни былтыр осы кезеңмен салыстырғанда 7,4%-ға өсті. Қала тұрғындарының қолайлы ортада өмір сүрулеріне барлық жағдай жасалып отыр. Мысалы, қалада газ тұтынушылар 98 пайыздан асса, биыл электрмен қамтуды 99%-ға жеткізу жоспарланған. Түркістанның жалпы аумағы соңғы үш жылда 19,6 мың гектардан 22,4 мың гектарға ұлғайып, халық саны 165,4 мың адамнан 220 мыңға артты. Президент тапсырмасын орындау үшін оның жергілікті өкілдері де әділ, турашыл, халыққа жақын болуы тиіс. Әл-Фараби бабамыз: «Бақыт – әрбiр адам ұмтылатын ұлы мақсат» деп, оған тек бiлiм мен игiлiк нәтижесiнде ғана жетуге болатынын, қаланы басқару үшін ізгілік қасиеттер болуы керек екендігін, қайырымды әкім басқарған қаланың көркі асқақтап, адамдары да бақытқа бөленеді деп айтқандай, бүгінгі таңда қалың елдің көңілінен шығатын әкімдер санаулы ғана. Ал екі жылға жуық уақыт Түркістан қаласына басшылық жасап келе жатқан Нұрбол Тұрашбеков халықтың тұрмыс-тіршілігіне назар аударып, өндіріс орындарын көбейтуге екпін беріп келеді. Жұртшылықпен арқа-жарқа әңгімелесу үшін алдымен, сол жұрттың жағдайын жасауды дұрыс көрген сыңайлы. Басты мақсаты – еңбек адамдарын лайықты көтермелеу, талантты жастарға қолдау көрсету. Барынша «Халық үніне құлақ асатын мемлекет» қалыптастыруға ынталы. Әлеуметтік желіде Түркістан қаласы туралы мәселе шықса, дереу түйінді шешуге атсалысады, әрдайым ашық диалогке шығады. Уақытының басым бөлігі қаланың қайнаған тіршілігін аралап, құрылыс орындарының жұмысын қадағалап, тиісті орындарға тапсырма береді. Қаламызда көптеген үйлер мемлекеттік тұрғын үй бағдарламасы бойынша салынды. Жаңа тұрғын үйлердің басым бөлігі көпбалалы отбасылар мен мүмкіндігі шектеулі жандарға берілген. Сонымен қатар қалада бірнеше әлеуметтік дүкендер де бар. Қаланың экологиялық ахуалын жақсарту және мәдени орталықтарды көбейту мақсатында түрлі саябақтар бой көтерді. Аулаларды көгалдандыру және тұрғындар үшін қолайлы жағдай жасау жұмыстары да қатарласа атқарылып келеді. Қала тұрғындарының ұсынысы бойынша жуырда демалыс орындары «Отбасы» саябағымен толықты. Көптеген жақсы жобалар жүзеге асырылуда. Атап айтқанда, қонақ үйлер, бордақылау кешені, сүт фермасы, мұз сарайы, ат спорты кешені, сондай-ақ Мемлекет басшысының тапсырмасына сәйкес биылдан бастап «Жайлы мектеп» бағдарламасы аясында тоғыз үлкен мектеп салынады.
Көне Түркістанның қандай қала болғанын білдіретін нысандар көп. Дегенмен аумағы ұлғайған бүгінгі қаланың тыныс-тіршілігі, келбеті бөлек. Бүгінде қарқынды құрылысымен қатты өзгерген қаланың қай бөлігінен де көненің белгісіндей көзге түсетін кесененің мұнарасы менмұндалайды.
Ғалымжан БИМҰРЗАЕВ,
Түркістан жоғары медицина колледжінің директоры, медицина ғылымдарының кандидаты
