Іс-шараға Парламент Мәжілісінің депутаты Дәулет Тұрлыханов, Қорғаныс министрінің орынбасары Сұлтан Қамалетдинов, «Amanat» партиясының хатшысы Дәулет Кәрібек және қарулы күштердің ардагерлері, танымал спортшылар қатысты.
– Жүрегінде отаншылдық рухы жалындаған жастардың жаңа буыны өсіп келе жатқанына бәріміз куәміз. Тәуелсіздігімізді нығайтып, елімізді одан әрі өркендету қазіргі ұрпақтың қасиетті борышы. Дәстүрге айналып келе жатқан «Qaisar» әскери-патриоттық ойындары – отаншыл жастарды адал қызмет етуге, ел қорғаны болуға тәрбиелейтін бірегей алаң. Былтыр іріктеу кезеңіне 1 700-ге жуық жас азамат қатысқан болса, биыл қатысушылар саны 3 мыңнан асты, – деді жиында «Amanat» партиясының хатшысы Дәулет Кәрібек.
Жалпы, партияның жастар қанаты бұл жобаны іске қосатынын былтыр «Amanat»-тың кезектен тыс XXII съезінде мәлімдеген еді. Биыл, міне, екінші мәрте аймақтарда 15-25 сәуір аралығында іріктеу жүргізілді. Бұл жолғы ойын бұрынғыдан өзгерек. Іс-шарада десанттық-шабуылдау әскерлері соғыстағы ұрыс барысын бейнелейтін көрініс қойды. Ал әлемге танымал атлет Сергей Цырульников жастардың алдында өз күшін көрсетіп, жиналған көпшілікті тәнті етті. Жиылғандар тілек айтып, ардагерлер ақ батасын берді.
– Ел қорғау – қасиетті борыш. Біз ақылды, сабырлы, санасы сергек, ойы ұшқыр жастарға қарап сүйсінеміз. Әрдайым қайсар, өжет, алғыр болыңдар. Ата-бабадан аманат болып қалған атамекенімізді қорғай біліңдер. Абыройларың аспандай берсін, – деді Қарулы күштер ардагері, контр-адмирал Ратмир Комратов.
Екі күнге жалғасқан бәсекеде финалистер қатарына ілігу үшін қатаң іріктеуден өтті. Нәтижесінде, шешуші сайысқа 120 қатысушы жолдама алды. Олар қашықтыққа жүгіріп, арнайы әскери жаттықтырушылар дайындаған кедергілермен жүріп сыналды. Сонымен қатар саптық дайындық деңгейлері көрсетіліп, «Менің елім – Қазақстан» атты әскери-танымдық викторинада білімдерін шыңдады.
– Еліміздің түкпір-түкпірінен жүзден жүйрік, мыңнан тұлпар жастар жиналды. Сіздер өз өңірлеріңізде қатардан қара үзіп, бүгінгі соңғы кезеңге жолдама алып келдіңіздер. Ал енді елорда төрінде жеңіске жету үшін осыған дейін жиған білім-біліктеріңізді, дара дағдыларыңызды, төзімдеріңізді танытасыздар деген ойдамын. Тіпті, араларыңызда болашақ Отан қорғаушылар, сержанттар мен офицерлер тұрғанына сенімдімін, – деді Қорғаныс министрінің орынбасары Сұлтан Қамалетдинов.
Сайыс қорытындысы бойынша, Түркістан облысының командасы жүлделі бірінші орынды иеленсе, Қарағанды облысының оқушылары екінші орынды қанжығасына байлады. Ал үшінші орынды Алматы қаласының командасы місе тұтты. Ұйымдастырушылар әр өңірдің үкілеген үмітін арқалаған өрендерге бағалы сый-сияпаттар табыстады.
– Жастар – егемен еліміздің болашағы. Сондықтан бұл іс-шара бәріміз үшін маңызды. Әрқайсыңыз тәрбиелі, білімді, мәдениетті, намысты азамат болып өсіп келе жатқандарыңызға сенімдімін. Өмірлеріңізде асықтарыңыз үнемі алшысынан түсуін тілеймін. Осы орайда, «Amanat» партиясына және бұл іс-шараның өтуіне атсалысқан азаматтардың бәріне алғысымды білдіремін. Еліміз аман, жұртымыз тыныш болғай, – деді Мәжіліс депутаты Дәулет Тұрлыханов.
Ал Түркістан облысынан келген команданың мүшесі Стас Грачев бұл жеңіс оңайлықпен келмегенін, алайда осы уақыт аралығында балалар жаңа дос тапқанын айтты.
