Ақылды оқушылар аламаны

Елдік мерейімізді асырған та­ғы бір игілікті шара елордада көрі­ніс тапты. Ол физика пәнінен оқу­шы­лардың 45-ші Халықаралық олим­пиадасы еді. Астанамыздың ай­бынын асырған Бейбітшілік және келісім сарайында тұсауы ке­сіл­ген ақылдылардың білім сайы­сын Білім және ғылым министрі Аслан Сәрінжіпов ашып, 88 мем­ле­­кет­тен келген 1000-ға тарта адам­­ға еліміздің оқу жүйесіндегі стра­­­тегиялық мақсат, міндеттерді та­ныстырды. Ұлттық модельдің ба­сым бағыты – зияткерлік элита­ны қалыптастыру екенін тілге тиек етті. Президент Нұрсұлтан На­зар­­баевтың салаға жасап жатқан ерек­ше қамқорлығын тарата айтып, да­рын­ды оқушыларымыздың әлем­дік білім сайысында топ жарып жүр­ге­нін, оған осының алдында Син­га­пур­да болған олимпиадада үш бір­дей алтынды қанжығаға бай­лаға­ны­мызды дәйекке келтірді. Ол бұдан кейін, төрткүл дүниеден білім бәйгесіне келген 700 оқушыға сәт сапар тіледі. Сол секілді, физика пәні (ІРһО) бойынша Халықаралық олимпиада президенті Ханс Йорданс сөз алып, Қазақ елінің көркейген Астанасы өзін де, өзгелерді де тәнті еткенін атап өтті. Олимпиадаға дүние жүзінен келген оқушылар осындай жас қаланы қай уақытта да естерінде ұстап, ілтипат көрсететінін қадап айтқан ол, мұндай білім сайысы барлық жерде бола бермейтінін де назарға салды. Әлемдік деңгейде өтіп жүрген білім бәйгесінде қазақ­стан­­дық оқушылардың әркез топ жаруы да бұл игілікті іске септігін ти­­гіз­­геніне дәйектер келтірді. Шы­нын­­да, «Дарын» республикалық ғы­­лы­­ми-практикалық орталығының де­­рек­т­еріне қарасаңыз Отанымыз­дың мыңнан тұлпар шыққан та­лант­тары өткен жылы оқушы­лар­д­ың халық­аралық олимпиадалар мен ғылыми жобалар конкурсында 967 жүлдені иемденіпті. Оның 188-і алтын, 298-і күміс, 463-і қола медаль екен. Олимпиаданың салтанатты ашылуы үш тілде – қазақ, орыс, ағыл­шын тілдерінде өтіп, ұлттық үлгі­міздің небір жауһарлары сахна төрі­нен орын алды. Шашу ша­шыл­ғанда түстері бөлек болған­мен, тілек­тері бір оқушылар ерекше іл­ти­пат танытты. Ұлттық салт-дәс­түрімізге, киім үлгілеріне, әнші Ар­дақ Балажанова «Пай-Пай» этно-фольклорлық ансамбліне қо­сы­лып «Қара жорға» әнін шыр­қа­ғанда жүздері бал-бұл жанып, тас­паға, суретке түсіріп жатты. Кей­бі­реулерімен тілдескенімізде: «Ұлттық жауһарларыңыз қандай керемет, қарап отырғанда ертегілер елінде жүргендей күй кешеді екен­сің», деді таңданыстарын біл­діріп. Бұл білім бәйгесіне Қазақ елі бес ұланын үкілеп қосып отыр­ға­нын айта кетелік. Алты күн ішінде ақылды оқушылардың білімі анық­талып, жүзден жүйріктерді мара­паттау 20 шілдеде болады. Сүлеймен МӘМЕТ, «Егемен Қазақстан».