Ұлтымыздың құндылықтарын лайықты дәріптей білудің бір көрінісі ретінде біздің облыстық балалар және жасөспірімдер кітапханасында «Сақ – этномәдени орталығы» ашылды. Бұл орталық түркі халықтарының тарихынан, оның бір тармағы болып келетін қазақ халқының ойындарынан, мәдениетінен, өнерінен хабар беріп, балаларды ұлттық салт-дәстүрге сусындатпақ. Тек қана ұлттық ойындармен шектелмей, таным көкжиегін кеңейтетін кітаптар насихатталып, әртүрлі пікірталастар ұйымдастырылады, ғылыми жобалар жасалады.
Жаңа орталықтың тұсаукесер рәсіміне зиялы қауым өкілдері келіп, жылы лебіздерін білдірді. Сондай-ақ шежіреші, қолөнер шебері Дүйсен Шөкенұлы өзі жасаған заттарды көрмеге әкеліп, қамшы өру, ертоқым, киізүйдің жасалу жолдарын көрсетті.
«Қоңыр: үн, тіл, діл» атты инсталляциялық көрме арқылы қатысушылар қазақ халқының бағзы замандағы сыр мен мұңға толы әуездерін тыңдап, әншілер мен күйшілер туралы толық мағлұмат алды.
Орталықты ашудағы мақсат – жас өскіндерді халқымыздың салт-дәстүрімен, нәрлі тағамдарымен, оралымды ойға бай мақал-мәтелдерімен таныстыру, садақ ату, ләңгі тебу, асық ату сынды ойындарды құмары қанғанша ойнату. Сонымен қатар «Сақ этномәдени орталығы» қазақ халқының ғана емес, бауырлас түркі халықтарының тыныс-тіршілігі мен салт-дәстүрінен мол мағлұмат береді.
Кітапханамызда ашылып жатқан орталық қоғамда бала тәрбиесіне қатысты олқылықтардың орнын толтырып қана қоймай, жас жеткіншектерге рухани азық береді деген ойдамыз. Орталықтың жұмысы 16 мамыр айынан бастап үздіксіз жұмыс істей бастады.
Роза БЕКЕЖАНҚЫЗЫ,
Шығыс Қазақстан облыстық балалар және жасөспірімдер кітапханасының қызметкері
