Атырау қалалық тұрғын үй-коммуналдық шаруашылығы және автокөлік жолдары бөлімінің басшысы Әлібек Мұханбеталиевтің мәліметінше, шаһардағы жолдың жақсы және қанағаттанарлық жағдайын 90%-ға жеткізу жоспарланып отыр. Осыған байланысты жолды қайта жаңғырту мен салу үшін республикалық, жергілікті бюджеттен 9,7 млрд теңге бөлінген.
«Мұнайлы шаһардағы С.Датов, Азаттық көшелерінің, Атырау-Индер, Атырау-Дамбы, Атырау-Астрахань бағытына шығатын күре жолдардың шаһар аумағындағы бөлігі қайта жаңғыртылады. Бұл үшін 4,2 млрд теңге қаражат қарастырылған. Ал Еркінқала, Еркінқала-2, Ракуш, Алмалы, Томарлы ауылдары мен «Балауса» шағын ауданында, сондай-ақ Бейбарыс даңғылынан Атырау-Астрахань бағытындағы автокөлік жолына дейінгі аралығына жол салынады. Оған 4,6 млрд теңге бөлініп отыр. Жаяу жүргіншілерге арналған жолды салу үшін 892 млн теңге жұмсалады. Шаһар маңындағы Атырау, Дамбы, Ақсай, Қайыршақты, Еркінқала ауылдарында, Атырау қаласында, Геолог, Жұмыскер елді мекендерінде жаяу жүргінші жолын салу көзделді», дейді Ә.Мұханбеталиев.
Оның айтуынша, М.Әуезов көшесі мен Зарослый елді мекеніндегі жобаларға түзетулер енгізіліп жатыр. Ал Атырау-Еркінқала автокөлік жолы, Әбілхайыр хан даңғылынан Жастар көшесіне дейінгі жол аралығы қайта жаңғыртудан өтеді. Әбілхайыр хан мен Бейбарыс даңғылын бір-бірімен қосатын автокөлік жолының жобасы ашық электронды конкурсқа берілген.
Қалалық тұрғын үй-коммуналдық шаруашылығы, жолаушылар көлігі және автомобиль жолдары бөлім басшысының орынбасары Бақтияр Хамидуллаевтың айтуынша, былтыр пәтер иелері кооперативтері мен тұрғындардың ұсынысына сәйкес «100 ауланы абаттандыру» жобасы әзірленген. Бұл жобаны іске асыру мақсатында жергілікті бюджеттен 1 млрд 37 млн теңге бөлініпті. Аталған жобаны «Атырау көлік» ЖШС, «Риголит» ЖСШ, «Sheberbuid» ЖШС іске асырады. Қазір шаһардың орталық көшелерінде, «Балықшы», «Авангард», «Лесхоз» және «Алмагүл» шағын аудандарындағы аулаларды жаңғырту жұмысы атқарылып жатыр.
«Биыл ауылішілік және жаяу жүргіншілер жолы, балалар ойын алаңдары мен спорттық жаттығу, доп ойнау алаңдары жаңартылады. Бұл жұмыстар алдағы қазан айына дейін аяқталып, қолданысқа беріледі. Атқарылып жатқан жұмыстар қатаң бақылауға алынды. Жыл соңына дейін тағы да 150 ауланы абаттандыру жөнінде жаңа жоба әзірленеді. Келер жылы қаладағы аулалар мен ауылішілік жолдар 100% жаңартылады», деп мәлім етті Б.Хамидуллаев.
Әкімдіктің баспасөз қызметі ұсынған ақпаратқа қарағанда, инфрақұрылымды жаңғыртатын осындай жобалардың қатарында жазғы су құбырын жүргізу де бар. Мұндай жұмыс осы кезге дейін атқарылған. Мәселен, былтыр Дамбы елді мекеніндегі 3 көшеге, Тасқала-1 ауылында орта мектеп, балабақша мен орталық көшеге 1 шақырым су құбыры жүргізілген. Сондай-ақ Алмалы ауылында 3,5 шақырымдық орталық көше мен мекемелердегі темір құбырлар пластик түріне ауыстырылып, су соратын сорғы орнатылған. Еркінқала ауылына 2 600 метр жазғы су жүйесі жүргізіліп, Жайық жағасына су сорғы станса іске қосылған.
Енді биыл Дамбы ауылындағы 10 көшеге, Амангелді елді мекенінде 4 көше мен 7 әлеуметтік нысанға ұзындығы 9 950 метрді құрайтын құбырлар тарту үшін қаражат бөлінді. Дәл осындай жұмыс Алмалы ауылында қайта жалғасады. Ауылды толық қамту үшін 19,4 шақырымға, Береке елді мекеніндегі 3,5 шақырымды құрайтын орталық көшелерге жазғы су құбырын жүргізу үшін қаражат бөлінді.
«Қызылбалық ауылында 4 мың метр жазғы су құбыры жүргізілді. Соның нәтижесінде жаңа саябақ, мектеп пен қосымша 4 көше су құбырымен қамтылды. Жалпы, ауылға 11 мың метр пластикалық құбыр салынды. Сонымен қатар Құрманғазы ауылында 1 100 метр магистралдық және 700 метр пластикалық құбыр жүргізіліп, су сорғы станса орнатылды. Қазір бұл ауылда трансформатор орнату жұмысы жүргізіліп жатыр», деп хабарлады әкімдіктің баспасөз қызметі.
Сондай-ақ Ракуша елді мекені мен «Балауса» шағын ауданына 9 090 метр жазғы су құбыры желісін тарту басталған. Осы кезге дейін 5 шақырымға жуық құбыр тартылған. Томарлы ауылындағы мектеп, мәдениет үйі мен орталық көшелерге 5 шақырым, Талғайраң ауылында 2 шақырым, Бесікті ауылындағы мектеп пен балабақшаға 2 шақырым, «Көктем» шағын ауданындағы білім ордасы мен бөбекжайға 2 шақырым су құбыры жүргізіліп жатыр. Наурыз айынан бері «Өрлеу» шағын ауданындағы 21 шақырымды құрайтын 10, «Қайнар шағын ауданының 7 көшесіне жазғы су желісі тартылып жатыр. Ақсай, Ақжар ауылдарына 5 шақырымдық жазғы су жүйесін жүргізу үшін тендерлік конкурс жарияланды. «Жұлдыз» және «Көктем» шағын аудандарына жазғы су құбырын тарту мақсатында арнайы жоба жасақтау қолға алынып отыр.
Атырау облысы
