Бірден 153 автокөлік берілді

Бүгінгі өскен өмірде мұндай жайлар таңсық емес. Денсаулық сақтау, құқық қорғау, мәдениет, білім беру және спорт саласы мекемелерінің автопаркі жыл сайын жаңа автомобильдермен толығып жатуы қалыпты құбылысқа айналғаны белгілі. Әйтсе де, осындайғы әр сәт ерекше де қуанышты оқиға ретінде есте қалуымен елеулі. Кеше Қарағанды облыстық ІІД автокөлік құрамы бірден  қызметтік 153 жүрдек машинаға ұлғаюы сондай жайт болды. «Шкода», «Тойота Хайс», «Нива» маркалы темір тұлпар­лар қоғамдық тәртіп сақшылары қолына тиді. Соның ішінде жол күзеті қызметіне арналған «Тойота Хайстың» жол ережесін бұзушыларды, қуып әкетушілерді, айыппұл төлемеушілерді тез анықтаудың құрал-жабдықтарымен толық жарақталған түрі қабыл­даушыларды қуантты. Автомобильдерді тапсыру рәсімі Тәуелсіздік алаңында өтті. Алдымен қаз-қатар тізілген арнаулы көліктердің ішкі жабдықталуын көрген облыс әкімі Нұрмұхамбет Әбдібеков Елбасының тапсырмасына сәйкес құқық қорғау ор­гандарының материалдық-тех­ни­калық базасын нығайту бағы­тында барлық іс-шаралар қолда­нылуын, мәселен, жергілікті бюджеттен осы мақсатқа 11 млрд. теңге бөлінуін айтып, кілттерді облыстық ІІД бастығы, генерал-майор Мергенбай Жаппаровқа табыс етті. Машиналардың біразы аудан­­дардың учаскелік инспек­тор­лары­ның пайдалануына берілді. «Бұл қызметтік автокөліктердің жұмысымызға зор көмегі тимек. Соның арқасында қылмыстың алдын алу, құқық бұзушылықты болдырмау, қылмыстардың ізін суытпай ашу жеңілдейтіні даусыз. Мемлекетіміздің міндетімізді атқаруға жақсы жағдай жасауы жауапкершілікті күшейтеді», деді Бұқар жырау ауданындағы Көкпекті ауылдық округінің учаскелік инс­пекторы Тұрар Құсаев. Былтыр да осынша арнаулы көлік берілген ІІД автопаркі тағы бірнеше түрімен толықты. Айқын НЕСІПБАЙ, «Егемен Қазақстан». ҚАРАҒАНДЫ.