Ұйымның «Педагогикалық өлшеулер» және «Білім беру бағдарламалары» орталығы отандық білім кеңістігінде екі тәуелсіз институтқа айналды. Сонымен қатар «NIS-Programme» және «NIS Grade 12 Certificate» бағдарламалары халықаралық деңгейде британдық «GCE AS/A-level» деңгейімен қатар бағаланады.
– Кембриджбен ұзақ мерзімді жұмыс барысында біз білікті мамандарды даярладық. Бірнеше жыл бойы жинақталған тәжірибені еліміздің және шет мемлекеттің білім салаларына енгіздік. Енді халықаралық дәрежеде мойындалған оқу бағдарламалары мен бағалау құралдарын өзіміз әзірлейміз. Бірақ Кембридж университеті аккредиттеу талаптарына сәйкес, Назарбаев зияткерлік мектептерінің үдерістеріне аудит пен мониторинг жүргізуді жалғастыра береді, – деді «Назарбаев зияткерлік мектептері» дербес білім беру ұйымының басқарма төрағасы Әнуар Жанғозин.
Кембридж білім беру серіктестігі мектеп басшылығын осы бағытта қолдап отыр. «Назарбаев зияткерлік мектептері небәрі он жыл ішінде Кембридж сияқты білім берудің жоғары стандарттарына қол жеткізді. Бұл басшылық пен ұжымның еңбекқорлығын көрсетеді», дейді бағдарлама жетекшісі Элисон Бролли.
Сондай-ақ зияткерлік мектептердің отандық және халықаралық оқу-ағарту саласына енгізген тың жаңалықтары мен оқушылардың білім көрсеткіштерін 7 халықаралық ұйым мен 44 шетелдік жоғары оқу орны мойындағанын еске сала кетейік.
Мерей АУҒАЛИ,
Л.Н.Гумилев атындағы ЕҰУ студенті
