Коллажды жасаған Зәуреш СМАҒҰЛ «EQ»
Стив Джобс 21 жасында досы Стив Возняковпен өз компаниясының іргетасын қалағаны баршаға мәлім. Ал оған дейін Стив колледжде оқыған. Бірақ аяқтай алмаған. Оны колледжден шығарып жіберген. Тіпті болашақ кәсіпкер есірткі қолданып, Үндістанда 7 ай тұрып, рухани азық алып, емделген екен.
Джобс Орегон штатындағы Рид колледжінде білім алған. Алғашқы курста миллионердің есінде қалғаны – каллиграфия. Қазақша тәпсірлесек, каллиграфия – құсни хат, яғни әдемі жазу өнері. Міне, болашақ миллионердің кәсібінің алғашқы қадамы да дәл осы өнерден басталған. Стив каллиграфияға бар ынтасымен берілген. Дәл сол уақытта өнертапқыш адамдарға минималистік әрі функционалды дизайннің керек екенін түсінеді. Оның 2011 жылы екінші айпадты «өнер және жаңа технологиялар қиылысы» деген жазбамен көпшілікке таныстыруы да сондықтан. Джобс әлгі іс-шарада «Apple»-дің ДНК-сына бір ғана технология жеткіліксіз. Технология мен өнерді, гуманитарлық ғылымдарды біріктіріп, оның нәтижесін көргенде ғана жүрегіміздің қағысы жиілейтіні анық», деген екен.
Ал енді мақаланың тақырыбындағы сұраққа келейік. Иә, хакерлер «Apple» мен Стив Джобсты ұнатпайды. Себебі өнертапқыш жабық жүйелерді ойлап тапқан. Ол бөгде адамдар кіріп, өзгертулер мен түзетулер енгізе алмайтын мінсіз құрылғыны жасап шығарды. Ал мұндай жағдайда хакерлердің қара терге түсетіні айтпаса да түсінікті. Әуелде Джобс ұялы байланыс құралына «Apple»-дің арнайы қосымшаларын ғана орнатуды көздеген. Кейін оны қызметкерлері райынан қайтарыпты.
Джобс өмірден өтіп кетсе де, компаниясының жұмысы табысты жалғасып жататын адамдарға тәнті болған екен. «Apple»-дің де өзінен кейінгі ғұмыры осылай болса екен деп армандапты. Оның асқақ арманы орындалғанына сіз бен біз куәміз. Сатылым бойынша «Apple» рекорд жаңартудан алдына қара салар емес. Бұл компания әуелі әлем бойынша алғаш рет 1 млрд долларға тең сатылым жасады. Кейін бұл рекорды жаңартып, 2 млрд доллар қаражат жинады. 2021 жылдың қаңтар айында белсенді «Apple» қолданушыларының саны 1 миллиард адамға жеткенін де қаперіңізге сала кетейік.
Айтпақшы, тірісінде Джобстың үстінен қара жейдені тастамайтынын көрген шығарсыз. Бұл оны өзгелерден ерекшелейтін образ. Оны жапондық дизайнер Иссэй Миякэ Стивке арнап 10 данасын тіккен. Джобстың бұл жейдеге көңіл аударуы да тектен-тек емес. Ол 1980 жылы Жапонияда «Sony» компаниясы қызметкерлерінің жұмысқа арналған арнайы формасын көріпті. Бұл өнертапқыштың көңілінен шыққан әрі форманы «Apple» қызметкерлеріне ұсынған. Алайда жұмысшылар мен Джобстың талғамы сәйкес келмей олар қара жейдеден бірден бас тартыпты. Бірақ миллионер қара жейдесін тастаған емес. Кейін бұл образ жалпыхалықтық сипат алды.
