Қоғам • 16 Маусым, 2023

Мүмкіндігі шектеуліге үміт берген

408 рет
көрсетілді
6 мин
оқу үшін

Адамның адамнан кемдігі жоқ. Бірінің он екі мүшесі сау, кейбірінің мүмкіндігі шектеулі шығар. Тағдырдың қиындығын көрген сондай жандар да көңілі қалаған, қолынан келетін іспен айналысуға тырысады. Жұртпен бірге жұмыс істегенді, табыс тапқанды қалайды.

Мүмкіндігі шектеуліге үміт берген

Атырау облыстық Жұмыспен қамтуды үйлестіру және әлеу­­меттік бағдарламалар бас­қар­масының бөлім басшысы Гүл­болат Аманғалиеваның мәлі­ме­тін­ше, биылғы үш айда жұмыспен қамту орталықтарына мүгедектігі бар 485 адам жү­гінген. Оның ішінде 407 адамға әлеу­меттік қолдау түрлері көр­сетілді. Ал 293 адам жұмысқа орналасты.

– Өйткені Атырау қаласы мен барлық ауданда мүгедектігі бар адамдарды жұмыспен қам­ту­ бағытында арнайы қаулы қа­был­данған еді. Осы қаулыға сәйкес мекемеде жұмыс істейтін адам­ның санына байланысты мүге­дектер үшін 2-4 пайыз көле­мін­де квота бөлу көзделген. Мүге­дек­ті­гі бар адамдарды жұмыспен қам­ти алатын мекемелер тізімі бекі­тілді. Мекемелердің басшыларына жұмыспен қамту ережесі түсіндірілді. Соның нәти­жесінде жыл басынан бері квота­мен 8 адам жұмысқа орналасты. Ал қау­лыны орындамай, мүге­дек­ті­гі бар азаматтар үшін квота бөл­меген мекемелердің тізімі тиіс­ті­ органдарға жолданды, дейді Гүл­бо­лат Аманғалиева.

Оның айтуынша, жыл басынан бері мүгедектігі бар адамдар­ды­ жұмыспен қамту үшін 105 адам­ қысқамерзімді оқу курста­ры­на жіберілген. Сондай-ақ биыл мүгедектігі бар 9 адамға 400 айлық есептік көрсеткіш мөл­шерінде мемлекеттік грант бе­ріл­­­­ген. Қазір олар жеке кәсібін дөң­­­­­ге­летіп отыр.

Құр­манғазы ауданында­ же­ке кә­сі­бін ашқандардың қата­рын­да­ «Нұршуақ мүгедектер қоға­мы»­ қоғамдық бірлестігінің тө­ра­йымы Гүлсара Қайырленова да­ бар. Кәсіпкер 2013 жылдан бе­рі ісмерлікті қолға алып, екі ті­гін­ шеберханасын ашқан. Тігін ше­бер­­ханасында арнайы тапсырыс­пен киім-кешек, көрпе-көп­шік, күн­делікті тұрмыста қол­да­ны­ла­тын өзге де заттарды дайын­дап шы­ғады. Бір ерекшелігі, кәсіп­кер ал­ғашқы кезекте бірінші және екін­ші топ мүгедектігі бар қыз­-келін­шектерді, жалғыз тұра­тын­­ ана­ларды жұмысқа алған.

– Осы кәсіппен айналыс­қа­­ны­ма он жылға жуықтады. Өзі­міз тік­кен дүниені сататын арнайы орын жоқ. Бірақ тігін шебер­хана­сы­на келген жандарға ұсын­сақ, бір­ден сатып алады. Өз тара­­пы­мыз­дан мүгедектігі бар қыз-келін­шек­­терді осы кәсіпке оқыту үшін те­гін тігін оқыту кур­сын аштық. Қа­зір олар да өз кәсібін ашып, жұ­мыс істей бас­тады. Әр жұмада мүм­кіндігі шек­теулі жандарға тегін қызмет көр­се­те­міз. Алдағы уа­қытта тігін шеберханасында тігіншілер санын кө­бейтуді жос­парлап отырмыз, дей­ді Г.Қайырленова.

Ал Махамбет ауданындағы Алға­ ауылының тұрғыны Аман­гүл­ Фазлиеваның өзі бала күнінен мүм­кіндігі шектеулілер санаты­на­ жатады. Екінші топтағы мүге­дек болғанымен, қолынан келмей­тінтіні жоқ. Құрақ көрпе ті­геді. Көпшікке түрлі ою сала­ды. Оның қолынан шыққан сәукеленің әсем­дігін көзбен көру керек. Сән­дік­ қол сөмкелерге қызығушы көп­.

– Тігін өнеріне бала кезімнен қы­зы­ғып, қолға алдым. Мақса­тым­ – тұрмысқа қажетті бұйым­дар­ды ұлттық нақышта жасау.­ Ме­нің қызығушылығым қуыр­­шақ­тарға көйлек тігуден бас­тал­ды. Өсе келе осы өнер түрі­мен айналысуға бел будым. Біраз нәрсені үйренуге тура кел­ді. Сөйтіп, тігін шеберхана­сы­на жұмысқа орналас­тым. Бұл тәжірибе жинауға көп сеп­ті­гін тигізді. Алдымен көрпе тік­тім. Содан кейін өзімді әртүрлі бағытта сынап көрдім. Қиын­дық­қа қарамастан, бастаған ісім оң нәтижесін берді. Қазір көр­пе, көпшік, бас киімдер, қыз жасауын тігемін. Қолөнер – сыры тұңғиық, өзгеше бір әлем. Зейініңді бастаған ісіңе бұру тір­­шіліктің тауқыметін аз уақыт­қа­­ болса да ұмытуға әсер етеді, дей­ді­ Амангүл Фазлиева.

Алға ауылының әкімі Расул Мусин­нің айтуынша, тігін­ші­лік­ті кәсіп еткен Амангүл Фаз­лие­­ва бірнеше рет аудандық, об­лыс­тық қолөнер көрмесіне, бай­­қауларға қатысқан. Биылғы ақ­панда «Бастау-бизнес» бағ­дар­­лама­сымен курстан өтіп, мем­ле­кет­­тік грант алуға құжат тапсырып қойған.

«Атамекен» ҰКП Жылыой аудандық филиалының жетекшісі Ерлан Нұрлановтың айтуынша, былтыр 76 адамға, оның ішінде мүмкіндігі шектеулі екі адамға мемлекеттік грант беріл­ген. Қайтарымсыз қаржы алған­дар­дың қатарында Айсұлтан Дүй­сә­­лиев те бар.

– Ешкі – тез көбейетін үй жануары. Оның сүті көптеген ауруға ем, ал еті жеңіл тағам қатарына жатады. Сол себептен, былтыр қайтарымсыз қаржыға 30-дан астам ешкі сатып алдым. Енді аудан тұрғындарын ешкінің сүтімен және етімен қамту ойда бар. Осы кәсібіме қоса қамыстан тақта да­йындаймын. Оны құрылысқа пайдалану үшін алатындар аз емес, дейді А.Дүйсәлиев.

Ал Қызылқоға ауданындағы «Мия­лы» мүгедектер қоғамдық бір­лестігінің төрағасы Асылбек Мұ­ратов екі жылдан бері жиһаз жа­сауды кәсіп етіп отыр. Осы мақ­­сат үшін үйінің жанындағы ғи­­ма­ратты жиһаз цехына айнал­дыр­ған.

– Кәсібімді бастау үшін түр­лі бағдарлама арқылы жеңілдетілген несие алған жоқпын. Алдағы уақытта цех аумағын ұлғайтуды жос­­парлап отырмын. Цехта 16 адам тұрақты жұмыс істейді. Аудандық жұмыспен қамту, әлеу­меттік бағдарламалар және азаматтық хал актілерін тір­кеу бөлімі арқылы мүмкіндігі шек­теулі 12 адамды жұмысқа қа­был­дадым. Оның ішінде бірінші топ­тың мүгедегі де бар, дейді Асылбек Мұратов.

Қазір цехта кереует, үстел шкаф­ секілді жиһаздар жасалады.­ Жұм­сақ жиһаздардың тысын ауыс­­тырып береді.

– Бала кезімнен әртүрлі зат­­­­­­ты құрастыруды ұна­та­тын едім.­ Жиһаз цехында дайын­ тақ­тай­ларды бұрғылау құралының кө­мегімен құрас­ты­рамын. Біздің жиһаз­дарымызға тұрғындар тарапынан тапсырыс көп түседі. Тап­сы­рыс берушілер жиһаз сапасына сын­ айтқан емес, – дейді бірінші топ­тағы мүмкіндігі шек­теулі жан Ма­хамбет Серік­қа­лиев.

 

Атырау облысы