Еліміздің тарихи астанасы саналатын киелі Түркістанда Ұлттық құрылтайдың кезекті отырысы басталады. Алғашқы Құрылтай исі қазақтың алтын бесігі атанған Ұлытауда өткен болатын.
Құрылтай деген сөз қазаққа бөтен емес. Қазақ қазақ болғалы, елдің, жердің өзге де келелі мәселелерді шешу үшін үш жүздің басын қосқан алқалы жиын – Құрылтай өтіп тұрған.
Былтыр Президент Қасым-Жомарт Тоқаевтың бастамасымен Ұлттық қоғамдық сенім кеңесі таратылып, оның орнына Ұлттық құрылтай құрылған еді. Киелі Түркістан жерінде өтетін құрылтайдың екінші жиынында қаралатын, талқыға салынатын дүние көп. Ең бастысы, мемлекеттің дамуы, елдің тұтастығы, жердің бүтіндігі сөз болары анық. Өйткені қазіргі халықаралық саясат ушығып тұрған кезде айналамызда болып жатқан оқиғаларды сараптап, соған сай өзіміздің бағыт-бағдарымызды таразылап отырғаннан ұтылмаймыз. Құрылтайға қоғам белсендісі, партияның басшысы ретінде шақырылып отырмын. Реті келсе, Құрылтайда біз де өз ойымызды айтып, ұсынысымызды ортаға саламыз.
Азаматхан ӘМІРТАЙ,
Ұлттық құрылтай мүшесі
