Ұлытау облысындағы жобаның алғашқы тұсаукесері Сәтбаев қаласындағы Төлек батыр алаңында болды. «Мейірімді жүрек» деп аталған демалыс кешін қаладағы Оқушылар сарайы, Өнер мектебі және №2 музыка мектебі бірлесіп атқарды. Аталған іс-шараға 300-ге жуық оқушы және олардың ата-аналары тартылды. Айрықша атап өтерлігі, іс-шара қайырымдылық аясында өтті. Кешке ерекше күтімді қажет ететін балалар арнайы қонақ ретінде шақырылды.
Балалар мен ата-аналар ұлттық ойындардың сайыстарына қатысты. Арқан тарту, асық атуға бала да, үлкен де қатысып, мәре-сәре болды. Он саусағынан өнер тамған ісмерлер балаларға сол жерде кесте тігіп, моншақ тоқу, т.б. үйретті. «Дуылдаған оркестр» өнерге қызығушылық танытқан балаларға кез келген музыкалық аспапта ойнап, өз қабілеттерін байқап көруге мүмкіндік берді. Оқушылар сарайында биылдан бастап жұмыс істей бастаған Садақ тарту үйірмесінің «сұрмергендері» де кештің қызықты да мазмұнды өтуіне белсене атсалысты.
– Мәселе жеңіс немесе жеңілісте емес. Мұндай іс-шара бір-бірімізді танып-білуге, балаларды ұлттық құндылықтарға жақындата түседі. Сондықтан ұйымдастырушыларға алғыс айтамыз, дейді ата-аналар лебізін жеткізген Лаура Смағұлова.
Қалалық білім бөліміне қарасты үш қосымша білім беру ұйымында 7 мыңға жуық бала бар. Олардың ішінде өнерлі өрендер көп-ақ. Кеш барысында олар сол өздері жасаған заттарынан жәрмеңке өткізді. Ал түскен қаржыны ерекше балалар тәрбиеленетін орталыққа берілді.
Ұлытау облысы