ЖЕҢІМПАЗ ПОШТА БӨЛІМШЕСІ

Жуырда “Қазпоштаның” Семей қалалық филиалының бастығы Манарбек Молдарахимов бізге ежелден мұңымыз да, жыры­мыз да бір еді, енді министрлігіміз де бір, ендеше баспасөзге жазылу науқаны барысында шалғайдағы Қайнар ауылындағы пошта бө­лімшесінің жұмысымен танысып қайтпаймыз ба деген мазмұнда өтініш білдірген. Бақсақ бақа екен демекші, “Қазпоштаның” қалалық фи­лиалы өткен жылдың қорытын­дысымен өз саласында облыс бойынша  жеңімпаз атанса, ал Қай­нардағы бөлімше қалалық филиалға қарасты отызға жуық бөлімше ішінен бірінші орынды иеленіпті. Бұл енді айтқанға ғана оңай. Әйтпесе, Семей, Курчатов қалалары мен Шүлбі қала үлгісіндегі  кенті ішінен оза шауып , бас жүлдені иелену үлкен жетістік. Өткен жылдың қорытындысы демекші, сол жылы ел газеті “Еге­меннің” Семей өңірі бойынша таралымы бірша­ма артып, 1200 данаға жеткен еді. Соған Абыралы өңіріндегі алты ауылдық округті байланыс қызметімен қамта­масыз етіп отырған Қайнар бөлімшесінің де қосқан үлесі зор. Қаладан бұл жаққа хат-хабар, түрлі деңгейдегі басылымдар апта ішінде үш рет жеткізіліп тұрса, соны аталған бөлімше ауыл-ауылдарға уақы­тында таратып беретін көрінеді. Мұнда “Егеменнің” екінші жартыжылдыққа таралымы жыл басындағы деңгейге жетіп үлгергенін естіп біздің де көңіліміз бір  марқайып қалды. Қайнар бөлімшесін Талғат Сәлменов деген бауыры­мыздың бас­қарып келе жатқанына жиыр-ма жылға жуықтап қалыпты. Яғни, бұл азамат өмірлік тәжіри­беден кенде емес. Қазірде бөлімшеде 12 адам жұмыс істейтін көрінеді. Талғат Түсіпбекұлы солар­дың ішінен өзінің орынба-сары Гүлшат Шыныбаева, опера­торлар Баһаргүл Мұқышева, Айжан Шайкенова, хат-хабар таратушы Жаңагүл Орынбе­кованың есімдерін ілтипатпен атай кетуді ұмытпаған. Ол бұдан кейінгі жерде қалалық филиалдың бастығы Манарбек Сады­құлына да риза екенін ағынан жарылып баяндап жатты. Шындығында, сондай қамқор­лық нәтижесінде бөлім­ше ерте бастан компьютерлендіріліп, интернет жүйе­сіне қосылыпты. Ал ол көптеген игі шараларды жүзе­ге асыруға мүмкіндік туғызыпты. Қазірде бөлімше еліміздің бес банкімен қоян-қолтық жұмыс жасап жатқан көрінеді. Ауыл тұрғындарынан түрлі төлемдерді қабылдау, ақша аудару, ақша алу секілді шаруаларында ешқандай кідіріс жоқ. Мұның сыртында посттерминал арқылы карточка жүйесін пайдаланушылар қатары да уақыт өткен сайын арта түсіп келе жатқан көрінеді. Ал ауыл тұр­ғындарына жалақы мен зейнет­ақыларын уақы­тында тарату бө­лім­шенің басты жұмысы болып та­бы­ла­ды. Бір сөзбен айтқанда, атал­ған бөлімше жұмысы саналуан. Тек бір әттеген-ай ғимарат мә­селесіне келіп тірелсе, Молдара­химов мырза осы жолы оны да жартылай шешіп үлгерді. Енді көп ұзамай бөлімше кең де қолайлы ғимаратқа жайғаспақ. Осы сапар барысында ауыл әкімі Еркебұлан Шәріпхановпен жолығып, тілдескенбіз. Әкім ауыл­д­ағы іргелі мекеменің мұндағы игі шаралардан ешқашан сырт қал­майтындығын айта келіп, бөлімше бастығы туралы да жақсы пікір білдірген. Талғат тек іскер басшы ғана емес, өнерпаз жан екен. Ән салатын, Қайнар халық театрының жұмысына үзбей атсалысатын Талғат кезінде Бүкілодақтық фес­тивальдің лауреаты да атаныпты. Ол қазірде де көркемөнерпаздар қатарынан табылуда. Дәулет СЕЙСЕНҰЛЫ. Шығыс Қазақстан облысы.