Медицина • 21 Маусым, 2023

Сақтандыру қорында қордаланған мәселе көп

1076 рет
көрсетілді
4 мин
оқу үшін

Ел арасында міндетті әлеуметтік сақтандыру қорына қатысты сын-пікір айтылып жүр. Оның дені сақтандыру пакетіндегі медициналық көмектің қолжетімділігіне қатысты қордаланған түйткілдер. «Ақ жол» демократиялық партиясында өткен дөңгелек үстелде Медициналық сақтандыру қорына қатысты көптің көкейінде жүрген мәселе қаралды.

Сақтандыру қорында қордаланған мәселе көп

Дөңгелек үстелге Парламент Мәжі­лі­сінің депутаттары, Әлеуметтік меди­ци­налық сақтандыру қорының төраға­сы Сәбит Ахметов, Денсаулық сақтау, Қар­­жы министрлігі, жекеменшік меди­циналық клиникалардың және олардың салалық бірлестіктерінің басшылары, медициналық қауымдастық өкілдері қа­тысты. Алдымен біз дөңгелек үстелдің мақсат-міндеті жайында «Ақ жол» пар­тиясының төрағасы Азат Перуашевтан сұрап білген едік.

– Медициналық сақтандыру қорына қатысты халықтан, оның ішінде жұмыс берушілерден партияға наразылық түсіп жатыр. Тіпті бірер ай жұмысы тоқ­тап, төлем жасамаған пациенттер­дің ара­сын­да сақтандыру пакетіндегі тиісті көмекті толық алмағандар бар екен. Бе­йінді мамандарға қаралу қиын. Партияға жекеменшік медициналық кли­­никалар­дан да арыз-шағым көп түсе­ді. Олардың айтуынша, медициналық сақ­тан­дыру қорының мемлекеттік және жеке­меншік ауруханаларға көзқарасы екі бөлек. Бұл – дұрыс емес. Себебі Кон­ституция бойынша мемлекеттік және жекеменшік қызметтің құзы­ры тең. Біздің ойымызша, осы меди­ци­на­лық сақтандыруды нағыз на­рық­­тық жолға салуымыз керек. Өйткені әрбір адам өзінің денсаулығына өзі жауап­ты. Мұнда әркім жеке төлемдерін дербес шотына жинағаны тиімдірек. Сондай-ақ пациент қай емханаға, қандай дәрігерге қаралатынын өзі шешуге тиіс, дейді Азат Перуашев.

Осыдан соң, Әлеуметтік медициналық сақтандыру қорының төрағасы Сәбит Ахметов МӘМС-ті үйлестірудегі мақсат-міндеттермен қоса кедергілерді жіпке тізіп баяндады.

– Түсініктірек болу үшін МӘМС жү­йесін енгізу идеясы неден басталғанын, қазір қандай іс-шараларды іске асырып, қай бағытта дамып жатқанымызды хабарлайын. МӘМС-ті енгізу бойынша жұмыс 2015 жылы басталды. Ме­ди­циналық сақтандырудың пакетін ке­зең-кезеңімен енгізу арқылы мемле­кетке, бюджетке артық салмақ салмау кө­з­дел­ді. Бірақ іс жүзінде барлығы басқа­ша өрбіді. Бюджетке салмақ көбірек түс­ті. Қаржыландыру артты. Бізде МӘМС жүйесінен кейінгі жетістіктер бар. Жо­ғары технологиялық операцияларға, диаг­­ностика, оңалтуға бөлінетін қаржы артты. Сонымен қатар дәрігерлер мен орта буын мамандардың жалақысы өс­ті. Бұдан басқа да тиімді тұстары бар­шылық. Қазір МӘМС-ті дамытудың алуан нұсқалары талқыланып жатыр. Негізі МӘМС-ті енгізерде Германия, Еуропа тәжірибелері ескерілген. Бұл жүйенің бағасын қазір бере алмаймыз. Өйткені медициналық сақтандыру ке­шегі пандемияда ғана нақты іске аса бас­тады. Санаулы жылда МӘМС туралы біржақты шешім шығару ерте секілді. Себебі жүйе өзінің әлеуетін әлі толық көрсете алмады. Ал еуропалықтардың сақтандыру қоры бойынша ондаған, жүздеген жылдық тәжірибесі бар, деген Сәбит Ахметов МӘМС жүйесіндегі бұдан өзге де мәселелерді қаузады. Со­ның ішінде МӘМС-ті цифрландыруға қатыс­ты кемшілік қамтылды. Ол сөзін түйін­дей келе жекеменшік және мем­лекеттік емханалардың арасында бәсе­ке­лестік артса, мұндай оң өзгеріс меди­цина­лық көмектің сапасына әсер ететінін айтты.

Басқосуға қатысқан жұмыс беруші­лер қордың бюджеті мен қаржылық ағын­да­рын жария етіп, әрбір қатысушы­ның жеке жинақтарын сақтауды ұсын­ды. Әрине, осы тұста медициналық кө­мек­тің сапасы, ұзын-сонар кезекте сөз болды. Тоқсан ауыз сөзді түйіндей келе «Ақ жол» демократиялық партиясы­ның төрағасы Азат Перуашев алда МӘМС бойынша тағы да кездесу өткізіп, мәселе­ні талқылауға жеке емханалар мен бизнес өкілдерін шақыруға дайын екенін жеткізді.