Парламент • 27 Маусым, 2023

Ерлан Қошанов Мәжіліс сессиясын қорытындылады

231 рет
көрсетілді
3 мин
оқу үшін

Бүгін Мәжілістің VIII шақырылымының бірінші сессиясының қорытынды отырысы өтті. Парламент Мәжілісінің төрағасы Ерлан Қошанов атқарылған жұмыстардың нәтижесімен бөлісті, деп хабарлайды Egemen.kz

Ерлан Қошанов Мәжіліс сессиясын қорытындылады

«Президент Қасым-Жомарт Кемелұлы Тоқаев осы сессияның ашылуында Мәжілістегі әрбір фракцияның алдына бірқатар міндеттер жүктеді. Фракция мүшелері де, бір мандатты округтер бойынша сайланған депутаттар да Мемлекет басшысының реформаларын іс жүзінде жүзеге асыруда белсенді жұмыс жасады, өйткені бұл – еліміздің дамуына үлес қосатын ортақ мақсатымыз. Соңғы сессия қысқа мерзімге қарамастан өте маңызды және мазмұнды болды. Бұл шақырылымның бір ерекшелігі – көптеген маңызды заң жобаларына депутаттардың өзі бастамашы болды. Бұл сессияда барлығы 31 заң қабылданды. Оның үштен бірі депутаттар бастамашы болған заңдар», деді Ерлан Қошанов.

Сондай-ақ Ерлан Қошанов әрбір депутаттың бастамасының астарында партиялар мен депутаттардың ұстанымдары, сайлаушылардың үміті тұрғанын атап өтті. Оның айтуынша, депутаттар сайлау науқаны барысында айтылған азаматтардың барлық талаптарын ескерген.

«Осылайша, депутаттар қоғамдық бақылау, заңсыз алынған мүлікті мемлекет меншігіне қайтару, жол қозғалысын ұйымдастыру, сұйытылған газ және тұрғын үй-коммуналдық шаруашылық айналымын реттеу мәселелері бойынша онлайн-платформаларда және онлайн режимінде заңдарды қабылдауға бастамашы болды. Әрбір заң азаматтық қоғам өкілдерімен жан-жақты талқыланды. Елбасы «Күшті Президент – ықпалды Парламент – есеп беретін Үкімет» формуласын жариялағанын білесіздер. Оның аясында Мәжілістің өкілеттігі күшейтілді. Осы тұжырымдаманы орындау мақсатында осы сессияда біз бірінші рет Жоғарғы есеп палатасының есебін тыңдадық. Депутаттар белсенділігінің тағы бір көрсеткіші – депутаттық сауалдар. Бұл сессияда әрбір жалпы отырыста орта есеппен 30-ға дейін депутаттық сауал айтылды. Олардың әрқайсысы азаматтардың өмірін жақсартуға бағытталған өткір мәселелерді көтерді. Әрбір айтылған мәселенің шешімі біздің ерекше бақылауымызда болады», деді Ерлан Қошанов.

Сондай-ақ Ерлан Қошанов депутаттардың жұмысы сайлаушылар үшін әрқашан ашық екенін атап өтті.

Оның айтуынша, бұған Мемлекет басшысының еліміздің мемлекеттік телеарналарында пленарлық отырыстарды тікелей эфирде көрсету бастамасы септігін тигізіп, көрерменнің ыстық ықыласына бөленді.

«Барлық деңгейдегі кездесулер мен пікірталастар БАҚ өкілдері мен сарапшылардың қатысуымен барынша ашық өткізіледі. Бұл сессияда Мәжіліс жанындағы Қоғамдық палатаның жұмысы да қызу басталды. Халықты ерекше толғандыратын заң жобалары Палата отырыстарында қоғамдық сараптамадан өтеді. Депутаттар халықаралық парламенттік ұйымдар аясында және екіжақты парламентаралық ынтымақтастықты нығайту бағытында да белсенді жұмыс атқарды.

Жақында біз Қазақстанның төрағалығымен өткен Орталық Азия әйелдері диалогының отырысын сәтті өткіздік», деді Ерлан Қошанов.

Мәжіліс Төрағасы депутаттарға да үн қатты.

«Сессия аяқталуға жақын. Алда – аймақтарға сапарлар, халықпен кездесулер жоспарланған. Біз әр өңірге, соның ішінде шалғай ауылдар мен елді мекендерге жетуіміз керек. Біздің басты мақсатымыз – халықпен бірге болып, мәселелерді тиімді шешу, өңірлермен байланысты нығайту. Жазда атқарылған жұмыстар келесі сессия жұмысына оң әсерін тигізеді деп ойлаймын», деп қосты Ерлан Қошанов.